Parad Pieramohi ŭ Maskvie moža nie adbycca ŭpieršyniu za 30 hadoŭ — bajacca Ukrainu

Rasijskija ŭłady admianili pavietranuju častku Parada Pieramohi ŭ Maskvie i Pieciarburhu i razvažajuć nad pieranosam abo admienaj naziemnaj častki. Pra heta ŭ efiry Sałaŭjoŭ LIVE u niadzielu raskazaŭ Z-błohier Illa Tumanaŭ, piša telehram-kanał «Možiem objaśniť».

Za dzień da hetaha Dźmitryj Piaskoŭ na pytańnie ab admienie parada adkazaŭ uchilista: «My rychtujemsia da śviatkavańnia Dnia Pieramohi». Inšych aficyjnych zajaŭ nie było. U niekatorych haradach užo pačali rychtavacca da paradaŭ, ale z Maskvy i Pieciarburhu takich paviedamleńniaŭ niama.

U niadzielu na palihonie pavinna była prajści treniroŭka paradnych «karobak», ale jaje admianili, a vajskoŭcam skazali, što jany adbyvajuć u punkty pastajannaj dysłakacyi «da asablivych ukazańniaŭ», raskazaŭ Tumanaŭ.

Jon vykazaŭ mierkavańnie, što parad mohuć pieranieści na inšuju datu, jak heta było ŭ 2020 hodzie z-za COVID. Raniej ab admienie parada pisali i sam Tumanaŭ, i inšyja Z-błohiery.

Pryčyna admieny — dalnabojnyja ŭkrainskija rakiety, pryznaŭ Tumanaŭ, nie ŭdakładniŭšy, jakija mienavita rakiety napałochali Maskvu. Kryłatyja mohuć dasiahnuć Maskvy za paŭhadziny, a balistyčnyja — za 10 chvilin.

«Ujaŭlajecie, «parad, raŭniajsia, zvažaj» — i abjaŭlajecca rakietnaja niebiaśpieka. Što budzie adbyvacca na płoščy i vakoł jaje? Heta budzie značny ŭdar u miedyjnym płanie, navat kali ničoha nie dasiahnie», — razvažaje Tumanaŭ.

U apošnija miesiacy Ukraina paviedamlała pra źjaŭleńnie abo raspracoŭku dalnabojnych rakiet.

Kryłataja rakieta «Fłaminha» była pradstaŭlena ŭ žniŭni minułaha hoda. Jaje zajaŭlenaja dalnaść — 3000 km (da Maskvy ad ukrainskaj miažy tolki 450 km), vaha bajavoj hałoŭki — adna tona.

Jaje vykarystoŭvali jak minimum dvojčy: u lutym «Fłaminha» ŭdaryła pa Votkinskim zavodzie va Udmurcii, u sakaviku — pa pradpryjemstvie ŭ Samarskaj vobłaści.

Balistyčnaja rakieta FP-9 znachodzicca ŭ raspracoŭcy: pa słovach hałoŭnaha kanstruktara, jaje vyprabavańni pavinny pačacca letam. Jaje zajaŭlenaja dalnaść — 850 km (heta adlehłaść chopić, kab dasiahnuć Maskvy), z bajavoj hałoŭkaj 800 kh. Z-za vysokaj chutkaści i vyšyni palotu balistyčnyja rakiety vielmi ciažka pierachoplivać.

Z pačatkam vajny parady ŭ Maskvie značna skaracilisia.

U 2022 hodzie techniki było mienš (u paraŭnańni z 2021-m), a pavietranuju častku admianili. U 2023‑m kolkaść vajskoŭcaŭ skaraciłasia jašče na čverć, źnikli tanki (akramia troch T-34 časoŭ Druhoj suśvietnaj vajny), avijacyi znoŭ nie było. U 2024‑m samaloty źjavilisia, ale ŭsiaho 15 adzinak.

Jubilejny parad 2025 hoda byŭ maštabniejšy, ale sastupaŭ davajennamu (2021) u kolkaści ludziej i techniki. Samalotaŭ znoŭ było 15.

Vajskovyja parady ŭ Maskvie nie pravodzilisia ŭ 1991—1994 hadach, ich adnavili ŭ jubilejny 1995 hod.

• 2
• 2
• 25
• 0
• 0
• 1
• 0
• 0