Парад Перамогі ў Маскве можа не адбыцца ўпершыню за 30 гадоў — баяцца Украіну
Рашэнне аб адмене або пераносе могуць прыняць з-за новых украінскіх ракет, здольных дасягнуць Масквы за 10—30 хвілін.
Расійскія ўлады адмянілі паветраную частку Парада Перамогі ў Маскве і Пецярбургу і разважаюць над пераносам або адменай наземнай часткі. Пра гэта ў эфіры Салаўёў LIVE у нядзелю расказаў Z-блогер Ілля Туманаў, піша тэлеграм-канал «Можем объяснить».
За дзень да гэтага Дзмітрый Пяскоў на пытанне аб адмене парада адказаў ухіліста: «Мы рыхтуемся да святкавання Дня Перамогі». Іншых афіцыйных заяў не было. У некаторых гарадах ужо пачалі рыхтавацца да парадаў, але з Масквы і Пецярбургу такіх паведамленняў няма.
У нядзелю на палігоне павінна была прайсці трэніроўка парадных «каробак», але яе адмянілі, а вайскоўцам сказалі, што яны адбываюць у пункты пастаяннай дыслакацыі «да асаблівых указанняў», расказаў Туманаў.
Ён выказаў меркаванне, што парад могуць перанесці на іншую дату, як гэта было ў 2020 годзе з-за COVID. Раней аб адмене парада пісалі і сам Туманаў, і іншыя Z-блогеры.
Прычына адмены — дальнабойныя ўкраінскія ракеты, прызнаў Туманаў, не ўдакладніўшы, якія менавіта ракеты напалохалі Маскву. Крылатыя могуць дасягнуць Масквы за паўгадзіны, а балістычныя — за 10 хвілін.
«Уяўляеце, «парад, раўняйся, зважай» — і аб’яўляецца ракетная небяспека. Што будзе адбывацца на плошчы і вакол яе? Гэта будзе значны ўдар у медыйным плане, нават калі нічога не дасягне», — разважае Туманаў.
У апошнія месяцы Украіна паведамляла пра з’яўленне або распрацоўку дальнабойных ракет.
Крылатая ракета «Фламінга» была прадстаўлена ў жніўні мінулага года. Яе заяўленая дальнасць — 3000 км (да Масквы ад украінскай мяжы толькі 450 км), вага баявой галоўкі — адна тона.
Яе выкарыстоўвалі як мінімум двойчы: у лютым «Фламінга» ўдарыла па Воткінскім заводзе ва Удмурціі, у сакавіку — па прадпрыемстве ў Самарскай вобласці.
Балістычная ракета FP-9 знаходзіцца ў распрацоўцы: па словах галоўнага канструктара, яе выпрабаванні павінны пачацца летам. Яе заяўленая дальнасць — 850 км (гэта адлегласць хопіць, каб дасягнуць Масквы), з баявой галоўкай 800 кг. З-за высокай хуткасці і вышыні палёту балістычныя ракеты вельмі цяжка перахопліваць.
З пачаткам вайны парады ў Маскве значна скараціліся.
У 2022 годзе тэхнікі было менш (у параўнанні з 2021-м), а паветраную частку адмянілі. У 2023‑м колькасць вайскоўцаў скарацілася яшчэ на чвэрць, зніклі танкі (акрамя трох Т-34 часоў Другой сусветнай вайны), авіяцыі зноў не было. У 2024‑м самалёты з’явіліся, але ўсяго 15 адзінак.
Юбілейны парад 2025 года быў маштабнейшы, але саступаў даваеннаму (2021) у колькасці людзей і тэхнікі. Самалётаў зноў было 15.
Вайсковыя парады ў Маскве не праводзіліся ў 1991—1994 гадах, іх аднавілі ў юбілейны 1995 год.
Цяпер чытаюць
«Лукашэнка такі: Назарбаеў кажа, што трэба сыходзіць, а я не бачу пераемнікаў». Семчанка — пра сустрэчу з Лукашэнкам летам 2020‑га7
Каментары