«Pachavalnyja vianki». Ułady Hrodna spytali haradžan pra arki na hałoŭnaj vulicy. Bolš za 1000 kamientaroŭ — i amal usie suprać
U Hrodnie razharełasia dyskusija pra dekaratyŭnyja arki, jakija źjavilisia na hałoŭnaj piešachodnaj vulicy Savieckaj u 2025 hodzie. Paśla chvali krytyki ciaham hoda haradskija ŭłady vyrašyli zapytać u žycharoŭ: pakinuć arki na novy siezon ci prybrać. Adkaz pryjšoŭ chutka: za sutki pad dopisam u Instagram sabrałasia bolš za 1200 kamientaroŭ.
«Jany zakryvajuć horad»
Pieravažnaja bolšaść kamientataraŭ nastojvaje: arki treba prybrać. Asnoŭny arhumient — arki nie ŭpisvajucca ŭ histaryčny centr. Ludzi pišuć, što kanstrukcyi «pierakryvajuć vid na budynki», «źniščajuć pierśpiektyvu vulicy» i robiać centr vizualna ciažkim, a zimoj naohuł padobnyja na pachavalnyja vianki. Asabliva hučna pra heta kažuć hrodzienskija ekskursavody i miascovyja błohiery, kamientary jakich źbirajuć dziasiatki i sotni łajkaŭ.
«Arki abiasceńvajuć histaryčnuju kaštoŭnaść vulicy. Budynkaŭ amal nie vidać»», — piša adzin z kamientataraŭ.
Hrodziency nastojvajuć: hałoŭnaje na Savieckaj — heta architektura, praktyčna kožny budynak tam z šyldaj «historyka-kulturnaja kaštoŭnaść». I kali jaje pačynajuć dapaŭniać mietaličnymi kanstrukcyjami z kvietkami, jana prosta hublajecca.
«Z arkami źnikaje ŭsia pryhažość i prastora», — dzielacca mierkavańniem.
U kamientarach hrodziency nazyvajuć arki «vizualnym šumam» i «tannaj imitacyjaj upryhožvańnia», pieradusim z-za štučnych kvietak i płastykavych detalaŭ.
«Prybirajem — i jak maha chutčej. Hetyja žachlivyja arki psujuć abličča histaryčnaha centra i adnoj z hałoŭnych piešachodnych vulic. Hrodna zaŭsiody pryciahvaŭ turystaŭ tym, što ŭ im zachavaŭsia duch epochi. Raniej, špacyrujučy pa vulicy Savieckaj, možna było lubavacca pryhažościu architektury. A ciapier arki stali niezasłužana «hałoŭnaj słavutaściu» — mienavita ŭ dvukośsi. Jany litaralna źjadajuć prastoru i pieratvarajuć naš staražytny i pryhožy horad u niejki navadzieł.
Histaryčnaja vulica pieratvaryłasia ŭ placoŭku dla hulni ŭ «Ručajok». Viarnicie hrodziencam ich lubimy horad, a samomu Hrodna — jaho pieršapačatkovaje i niepaŭtornaje histaryčnaje i architekturnaje abličča!!!» — zaklikajuć.
Ludzi nahadvajuć, što heta ŭžo sfarmavanaja histaryčnaja prastora, jakaja sama pa sabie pracuje jak turystyčny abjekt: adrestaŭravanyja fasady, pierśpiektyva vulicy, atmaśfiera staroha horada.
«Horad, jaki siabie pavažaje, nie budzie ŭpryhožvać histaryčny centr płastykam», — pišuć u kamientarach.
Tyja, kamu arki nie zdajucca katastrofaj, prapanujuć ich prosta pieranieści. Naprykład, u park, spalny rajon ci na nabiarežnuju.
Arhumient prosty: u histaryčnym centry im nie miesca, ale jak elemient haradskoha dekoru jany mohuć žyć dzieści jašče.
Arhumienty «za» jość, ale ich vobmal
Kamientary ŭ padtrymku arkaŭ taksama jość, ale ich značna mienš.
Siarod arhumientaŭ, jakija hučać: arki, maŭlaŭ, robiać vulicu «žyvoj» i «utulnaj», dadajuć fotazony i pryvablivajuć turystaŭ, kampiensujuć niedachop zielaniny ŭ kamiennym centry.
Niekatoryja prapanujuć nie prybirać arki, a dapracavać, naprykład, zamianić štučnyja kvietki na žyvyja, schavać kamunikacyi, zrabić kanstrukcyi bolš estetyčnymi. Ale hetyja kamientary atrymlivajuć u niekalki razoŭ mienš padtrymki, čym krytyčnyja.
Ciapier čytajuć
Statkievič ab pratestach va Ukrainie: Kali vy abrali z takoj pieravahaj prezidenta i adnačasova Viarchoŭnaha hałoŭnakamandujučaha, to dajcie jamu kiravać2626
Kamientary