Ukrainskaje vydańnie patłumačyła sutnaść pretenzij da hałoŭnakamandujučaha Syrskaha

«Fiodaraŭ = bolš rasijskich strat, Syrski = bolš ukrainskich strat». Takija płakaty źjavilisia na akcyjach pratestu ŭ Kijevie i inšych haradach paśla taho, jak prezident Uładzimir Zialenski zvolniŭ ministra abarony Michaiła Fiodarava.

Pieršapačatkova pryčynami adstaŭki nazyvali palityčnyja matyvy abo baraćbu z karupcyjaj. Ale najbolš vierahodnaj viersijaj staŭ asabisty i prafiesijny kanflikt pamiž Fiodaravym i hałoŭnakamandujučym USU Alaksandram Syrskim.

Zialenski faktyčna paćvierdziŭ isnavańnie kanfliktu. Jon pryznaŭ, što nie zmoh prymusić dvuch kiraŭnikoŭ pracavać razam i ŭ takoj situacyi vymušany byŭ vybrać adzin z bakoŭ.

Da zvalnieńnia Fiodarava adkryta krytykavali hałoŭnakamandujučaha tolki adzinki — pieravažna tyja, chto ŭžo pakidaŭ słužbu abo nie zaležaŭ ad vajskovaha kiraŭnictva. Adnak paśla taho, jak Zialenski staŭ na bok Syrskaha, niezadavolenaść im, pavodle aŭtara, vyjšła daloka za miežy vajskovaha asiarodździa i achapiła značnuju častku ŭkrainskaha hramadstva.

Hienierał staroj škoły

Alaksandr Syrski — vypusknik Maskoŭskaj vyšejšaj vajskovaj navučalnaj ustanovy, artyleryst, jaki pačynaŭ słužbu jašče ŭ savieckaj armii. Na momant poŭnamaštabnaha ŭvarvańnia Rasii ŭ 2022 hodzie jon užo byŭ adnym z topavych ukrainskich hienierałaŭ.

Najbolš viadomyja jaho pośpiechi prypali na pieršy hod vajny. Syrski kiravaŭ abaronaj Kijeva, a vosieńniu 2022 hoda — paśpiachovym kontrnastupleńniem ukrainskich vojskaŭ u Charkaŭskaj vobłaści.

Adnak padčas praciahłych bajoŭ za Bachmut jahonyja rašeńni stali pradmietam krytyki. Choć rasijskija vojski panieśli vialikija straty, abarona horada taksama kaštavała Ukrainie značnych čałaviečych resursaŭ, asabliva paśla taho, jak viasnoj 2023 hoda rasijanie amal atačyli Bachmut.

U lutym 2024 hoda, paśla taho jak va Uładzimira Zialenskaha nazapasilisia pretenzii da tahačasnaha hałoŭnakamandujučaha Valeryja Załužnaha, Syrski ŭznačaliŭ USU. Da taho času jon užo mieŭ reputacyju hienierała staroj škoły z savieckim myśleńniem, jaki, tym nie mienš, byŭ vojenačalnikam ź jasnym taktyčnym rozumam i vialikim dośviedam. 

Pavialičyć

Ad mikrakiravańnia da «Miaśnika»

Na dumku aŭtara, u 2024—2025 hadach Syrski nie zdoleŭ prystasavać ukrainskuju armiju da vajny na źniasileńnie, u jakoj hałoŭnaj zadačaj pavinna było stać naniasieńnie maksimalnych strat praciŭniku pry minimalnych ułasnych. Zamiest hetaha, śćviardžajecca ŭ artykule, vojski niaredka atrymlivali zahad utrymlivać pazicyi abo viartać stračanyja lubym koštam.

Heta pryvodziła da vialikich strat, ad jakich paśla brakavała ludziej, kab zaniać i ŭtrymlivać bolš vyhadnyja abarončyja rubiažy. Mienavita paśla bajoŭ za Bachmut častka vajskoŭcaŭ dała Syrskamu mianušku «Miaśnik».

Situacyju jašče bolš paharšali inšyja elemienty tak zvanaj savieckaj kultury kamandavańnia, jakuju ŭvasablaŭ Syrski. Kamandziry, bajučysia pakarańnia za stratu pazicyj, nibyta časta dakładvali navierch nie pra realny stan spraŭ. U vyniku Hienštab prymaŭ rašeńni na padstavie niedakładnaj infarmacyi, a bryhady i bataljony atrymlivali nieefiektyŭnyja zahady, jakija faktyčna nie mahli asprečyć.

Jašče adnoj pryčynaj krytyki nazyvajuć schilnaść Syrskaha da mikrakiravańnia, kali zahady z Hienštaba pastupali ažno da rotnaha ŭzroŭniu.

U jakaści prykładu aŭtar pryvodzić apieracyju ŭ Kurskaj vobłaści Rasii. Pačatkovy nastup nazyvajecca śmiełym i dobra arhanizavanym, adnak paźniej utrymańnie płacdarma pieratvaryłasia ŭ stratehičnuju prablemu. Jak i raniej u Bachmucie i Aŭdziejeŭcy, zaciahvańnie z adychodam, pavodle aŭtara, pryviało da strat, jakich možna było paźbiehnuć.

«Kryzis mabilizacyi»

Zaciažnaja vajna na źniasileńnie, piša The Kyiv Independent, pahłybiła nie tolki deficyt asabovaha składu va ŭkrainskaj armii, ale i hramadskaje niezadavalnieńnie mabilizacyjaj. Da siaredziny 2024 hoda amal nichto z dobraachvotnikaŭ nie padpisvaŭsia na słužbu ŭ piachocie, a prymusovaja mabilizacyja stała značna bolš prykmietnaj.

Palityčnaje kiraŭnictva imknułasia nie zakranać hetaj temy, a kamandavańnie na čale z Syrskim nie zdoleła bolš efiektyŭna vykarystoŭvać novych mabilizavanych. Zamiest papaŭnieńnia zahartavanych bryhad stvaralisia novyja, a padraździaleńni niaredka pierakidvali pamiž učastkami frontu, kab zakryć prahały ŭ abaronie.

Taktyka ŭtrymańnia pazicyj luboj canoj pryvodziła da vysokich strat u piachocie. Pry hetym u apošnija hady, z raspaŭsiudžańniem bieśpiłotnikaŭ, vyžyvać piachocie stała značna ciažej. Na dumku aŭtara, va ŭmovach, kali Ukraina nie moža dazvolić sabie takich ža strat, jak Rasija, zachavańnie žyćciaŭ vajskoŭcaŭ stanovicca klučavoj umovaj dla ŭtrymańnia frontu.

«Skielahiejt»

Jašče adnoj padstavaj dla krytyki Syrskaha stała jaho staŭka na šturmavyja pałki. Pavodle The Kyiv Independent, jany niaredka byli bolšyja za cełyja bryhady, atrymlivali niepraparcyjna vialikuju kolkaść mabilizavanych i vykarystoŭvalisia dla šturmavych apieracyj na samych składanych učastkach frontu pad niepasrednym kiraŭnictvam hałoŭnakamandujučaha.

Asablivuju ŭvahu aŭtar nadaje 425‑mu šturmavomu pałku «Skiela», jaki, pavodle šmatlikich śviedčańniaŭ, mieŭ reputacyju padraździaleńnia, dzie byli raspaŭsiudžanyja hvałt, złoŭžyvańni i vialikija straty asabovaha składu. U červieni vydańnie Babel paviedamiła pra 26 śmierciaŭ padčas bazavaj padrychtoŭki ŭ hetym pałku. Paśla rasśledavańnia kamandzira adchilili ad pasady, ale, jak adznačajecca ŭ artykule, šyrejšaj adkaznaści jon pakul nie panios.

Nieŭzabavie paśla hetych publikacyj byŭ aryštavany były načalnik štaba «Skieli», jaki na toj momant kamandavaŭ 155‑j miechanizavanaj bryhadaj. Jaho abvinavacili ŭ tym, što jon addaŭ zahad zabić dvuch vajskoŭcaŭ svajoj bryhady.

Publikacyi pra «Skielu» supali z reformami eks-ministra abarony Michaiła Fiodarava, jaki prapanoŭvaŭ istotna pavysić apłatu słužby piachotnikaŭ i šturmavikoŭ, što vyhladała procilehłym padychodam.

Dvum u łodcy stała ciesna

Kali ŭ studzieni 2026 hoda Michaił Fiodaraŭ uznačaliŭ Ministerstva abarony, mnohija čakali kanfliktu pamiž im i hałoŭnakamandujučym Alaksandram Syrskim. Pavodle vydańnia, Fiodaraŭ imknuŭsia pravieści reformy, zrabić sistemu bolš efiektyŭnaj, praanalizavać straty vojska i ŭziać pad kantrol kryzis z asabovym składam.

Pavialičyć

Na svajoj pres-kanfierencyi paśla zvalnieńnia Fiodaraŭ zajaviŭ, što hałoŭnymi prablemami ličyć pierakładańnie adkaznaści na nižejšyja ŭzroŭni, atmaśfieru chłuśni, nieefiektyŭnuju pracu šerahu armiejskich karpusoŭ, častyja źmieny kamandziraŭ bryhad i adsutnaść analizu paniesienych strat.

Fiodaraŭ śćviardžaŭ, što byŭ hatovy pracavać razam z Syrskim, ale toj admoviŭsia ad supracoŭnictva i, skarystaŭšysia svaimi adnosinami z Uładzimiram Zialenskim, damohsia jaho zvalnieńnia. Aŭtar adznačaje, što mnohija ŭkraincy bačyli ŭ reformach Fiodarava procivahu savieckamu stylu kiravańnia, jaki źviazvajuć z Syrskim.

Syrski ŭsio ž pojdzie ŭ adstaŭku?

Paśla zvalnieńnia Michaiła Fiodarava krytyka Alaksandra Syrskaha vyjšła daloka za miežy vajskovaha asiarodździa. Da patrabavańniaŭ adpravić hałoŭnakamandujučaha ŭ adstaŭku dałučylisia niekatoryja vałanciory, niekatoryja vieterany, analityki, deputaty, i navat niekatoryja dziejnyja vajskoŭcy i kamandziry. Pry hetym inšyja vajskoŭcy adkryta vystupili ŭ jaho abaronu.

Pakul pratesty nabirali abaroty, źjavilisia paviedamleńni, što Zialenski razhladaje mahčymaść zvalnieńnia Syrskaha. Na hetym fonie prezident sustreŭsia nie tolki z hałoŭnakamandujučym i Fiodaravym, ale i ź inšymi viadučymi hienierałami, u tym liku ź Michaiłam Drapatym, jakoha časta nazyvajuć mahčymym pierajemnikam hałoŭnakamandujučaha.

Na dumku aŭtara, ciapierašni kryzis moža stać katalizataram bolš hłybokich źmienaŭ u vajennym kiraŭnictvie.

Supraćstajańnie pamiž Syrskim i Fiodaravym, ličyć aŭtar, stała simvałam baraćby pamiž dźviuma madelami ŭkrainskaj armii. Adna abapirajecca na tradycyjnuju vajskovuju sistemu, jakuju jaje krytyki nazyvajuć «savieckaj», druhaja — na reformy, sučasnyja technałohii i pryncypy kiravańnia, zapazyčanyja ź biźniesu i IT.

Z artykuła The Kyiv Independent možna zrabić vysnovu, što ludziam «zvonku» ciažka skazać, jaki padychod bolš efiektyŭny va ŭmovach žorstkaj vajny.

Ad kančatkovaha rašeńnia Zialenskaha moža zaležać dalejšy chod vajny.

• 11
• 1
• 1
• 0
• 1
• 1
• 0
• 0