Ustanoŭlena dakładnaje miesca ŭ Łondanie, dzie stajaŭ dom Šekśpira

Navukoŭcy ŭstanavili dakładnaje miescaznachodžańnie doma Uiljama Šekśpira ŭ Łondanie, adzinaj nieruchomaści, jakoj vałodaŭ paet u brytanskaj stalicy — pra heta paviedamiła pres-słužba Karaleŭskaha kaledža Łondana, piša Bi-bi-si.

Dom, kupleny Šekśpiram u 1613 hodzie, za try hady da śmierci, znachodziŭsia na cichaj vulicy ŭ rajonie Błekfrajiers — u sučasnym Sici.

Pavialičyć

Miescaznachodžańnie i pamiery doma zmahła ŭstanavić daśledčyca tvorčaści Šekśpira Lusi Manro z Karaleŭskaha kaledža Łondana: jana znajšła ŭ brytanskich archivach niekalki dakumientaŭ, na adnym ź jakich byŭ namalavany płan rajona Błekfrajiers, składzieny ŭ 1668 hodzie, užo paśla Vialikaha łondanskaha pažaru. Płan rajona paćviardžaŭ dakładnaje miescaznachodžańnie i pamiery doma Šekśpira.

Hetaja znachodka źmianiaje ŭjaŭleńnie pra apošnija hady žyćcia Šekśpira. Raniej ličyłasia, što Šekśpir paśla pažaru ŭ «Hłobusie» ŭ 1613 hodzie pajšoŭ z teatra i viarnuŭsia ŭ Stratfard-na-Ejvanie.

Toje, što jon u 1613 hodzie kupiŭ dom u Łondanie niedaloka ad teatra «Hłobus», śviedčyć pra toje, što Šekśpir u apošnija hady žyćcia praciahvaŭ udzielničać u teatralnym žyćci horada.

Dom paeta byŭ raźmieščany ŭ nižniaj častcy sučasnaj vulicy Bierhan u łondanskim Sici. Zaraz na miescy doma Šekśpira stajać budynki kanca XIX stahodździa, raźmieščanyja pa adrasach Bierhan-stryt, 5 i Sient-Endrus-Chił, 5.

Siniaja miemaryjalnaja doška ŭ honar Šekśpira na Sient-Endrus-Chił, jak vyśvietliłasia, znachodzicca nie «pobač» ź miescam jaho łondanskaha doma, a mienavita na tym samym miescy, dzie kaliści znachodziŭsia dom paeta i dramaturha.

Pa słovach Lusi Manro, dom byŭ častkaj «Vialikich Varot» na ŭjeździe ŭ rajon Błekfrajiers, dzie raźmiaščaŭsia bujny daminikanski manastyr XIII stahodździa

Manro vyjaviła try dakumienty, jakija paćviardžali miescaznachodžańnie doma Šekśpira. Dva dakumienty zachoŭvalisia ŭ Łondanskim archivie i jašče adzin — u Nacyjanalnym archivie.

Adzin z dakumientaŭ ujaŭlaŭ saboj płan častki rajona Błekfrajiers, składzieny ŭ 1668 hodzie, praz dva hady paśla Vialikaha łondanskaha pažaru. Na płanie namalavana tolki častka doma dramaturha.

Dva inšyja dakumienty adnosiacca da prodažu nieruchomaści ŭ Błekfrajiers unučkaj Šekśpira ŭ 1665 hodzie.

«Ja pravodziła daśledavańnie ŭ ramkach bolš maštabnaha prajekta i nie mahła pavieryć svaim vačam, kali zrazumieła, što baču płan doma Šekśpira ŭ Błekfrajiers», — kaža Manro.

Pavodle jaje słoŭ, doŭhi čas ličyłasia, što nijakich śviedčańniaŭ pra dom Šekśpira ŭ Łondanie nie zachavałasia, tamu novyja daśledavańni nie pravodzilisia.

«Hetyja znachodki sapraŭdy dapamahajuć nam raskazać poŭnuju historyju doma Šekśpira ŭ Błekfrajiers, i dziakujučy hetamu novamu adkryćciu my ciapier dakładna viedajem, dzie jon znachodziŭsia», — kaža daśledčyca.

Manro adznačaje, što dom znachodziŭsia pobač z teatram Błekfrajiers, dzie pracavaŭ Šekśpir.

«My viedajem, što Šekśpir paźniej, u 1613 hodzie, u suaŭtarstvie z Džonam Fletčeram napisaŭ trahikamiedyju «Dva znatnyja radzičy». I novyja śviedčańni pra toje, što dom u Błekfrajiers byŭ davoli vialikim, dazvalajuć vykazać zdahadku, što častka pjesy mahła być napisana mienavita ŭ hetym domie», — adznačaje Lusi Manro.

• 1
• 0
• 0
• 0
• 0
• 0
• 0
• 0