Rasijski vajenkar, jaki raniej kipieŭ šavinizmam, pryznaŭ, što ŭsio panyła. «Praciŭnik usio bačyć i zahadzia chavajecca»

Aŭtar telehram-kanała Fighterbomber zajaŭlaje, što na hetym etapie vajny «baki prystasavalisia adzin da adnaho i ničym ździvić adzin adnaho ŭ płanie baraćby za panavańnie ŭ pavietry luboha vidu pakul nie mohuć».

Pavodle jaho słoŭ, u hetym pytańni ŭ abodvuch bakoŭ nazirajecca vidavočny zastoj, a kolkasnaja pieravaha ŭ nośbitach daje tolki mahčymaść užyvać bolš srodkaŭ paražeńnia, ale nie źmianiaje situacyju jakasna.

Asnoŭnaj pryčynaj aŭtar nazyvaje prazrystaść pavietranaj prastory. Abapał frontu ŭściaž stvoranaja ščylnaja sistema manitorynhu, jakaja pracuje na sotni kiłamietraŭ u hłybiniu.

«Samalot bačać za sotniu kiłamietraŭ ad linii bajavoha sutyknieńnia, vyznačajuć jaho typ i pačynajuć vieści jaho łakacyjna», — piša Fighterbomber. Heta pazbaŭlaje avijacyju hałoŭnaha — efiektu niečakanaści. Piłoty viedajuć, što ich bačać, i tamu nie ryzykujuć nabližacca da zon paražeńnia supraćpavietranaj abarony.

Sučasnyja technałohii dazvalajuć bačyć nie tolki samaloty, ale i momant prymianieńnia zbroi.

Luby pusk rakiety ci skid kiravanaj avijabomby adlustroŭvajecca na radarach praciŭnika ŭ režymie realnaha času. U vyniku «praciŭnik zahadzia (da 15 chvilin da prylotaŭ ŭ asobnych vypadkach) ukryvajecca ŭ biaśpiečnym miescy abo tupa pakidaje svoj abjekt na čas ataki», — kanstatuje błohier.

Pry hetym jon adznačaje cyničnuju detal: choć realnaja efiektyŭnaść udaraŭ padaje, u aficyjnych spravazdačach heta nie adlustroŭvajecca. Na papiery celi ličacca źniščanymi, što dazvalaje kamandavańniu atrymlivać uznaharody i vypłaty. Takim čynam, «usio ŭsich zadavalniaje».

Padzieńnie dakładnaści ŭdaraŭ i imitacyja bajoŭ

Pavietranyja bai, pavodle acenki błohiera, vyhladajuć jašče «sumniejšymi». Źniščalniki stralajuć rakietami ź vielizarnych adlehłaściaŭ, nie ŭvachodziačy ŭ zonu paražeńnia SPA, a hałoŭnaj metaj takich puskaŭ stanovicca sproba «pravakavać SPA na raschod rakiet». Pry hetym i samaloty, i sistemy SPA (i Patriot, i S-400) adrazu bačać niebiaśpieku i svoječasova adychodziać u biaśpiečnaje miesca.

Asobnuju zaniepakojenaść u aŭtara vyklikaje praca srodkaŭ radyjoelektronnaj baraćby, jakija navučylisia efiektyŭna padaŭlać sistemy naviadzieńnia. U jakaści prykładu jon pryvodzić rasijskuju statystyku z adnaho z kirunkaŭ: za try miesiacy z 727 skinutych fuhasnych avijabombaŭ tolki 419 prylacieli «prykładna ŭ rajon celi» — i toje prykładna i ŭmoŭna. 

«Dakładnaść padaje», — padkreślivaje Fighterbomber, adznačajučy, što REB abodvuch bakoŭ navučyłasia spraŭlacca navat z sučasnymi sistemami abarony sihnału typu «Kamieta».

Aŭtar kanstatuje, što ŭsie vidavočnyja sposaby zrabić rabotu avijacyi bolš vynikovaj, nie pavialičvajučy pry hetym kolkaść źbitych samalotaŭ, užo daŭno vyčarpanyja abodvuma bakami. Bolš za toje, navat tyja taktyki, što mohuć vyhladać jak «praryŭnyja» abo revalucyjnyja, nie jość sakretam: ich łohika i nastupstvy dobra zrazumiełyja i pradkazalnyja.

Heta datyčyć i sprobaŭ źmianić charaktar bajavych dziejańniaŭ praz vykarystańnie drobnych, mabilnych hrup — tak zvanych bajavych dvojek, asobnych braniavanych mašyn abo lohkaj techniki, jakaja dazvalaje pratočvacca praź liniju frontu. Takija padychody ŭžo aprabavanyja, i ich patencyjał taksama abmiežavany, bo praciŭnik razumieje ich pryncypy i hatovy supraćdziejničać.

Kab realna źmianić situacyju, piša rasijski vajenbłohier, treba pierachodzić da krajnie niebiaśpiečnych mietadaŭ: palotaŭ na zvyšmałych vyšyniach dziela minimizacyi ryzyki ad supraćpavietranaj abarony, aktyŭnaha vykarystańnia źniščalnikaŭ dla papiaredniaj «rasčystki» pavietranaj prastory pierad udarami, a taksama viartańnia viertalotaŭ i šturmavikoŭ da atak ź pikiravańnia.

Adnak Fighterbomber padkreślivaje: takija kroki niepaźbiežna pryviaduć da šmatrazovaha pavieličeńnia strat u samalotach i piłotach. A Rasija nie hatovaja tak ryzykavać svajoj avijacyjaj.

Zaviaršajučy svoj analiz, aŭtar z horkaj ironijaj padsumoŭvaje: na pierałom Rasii spadziavacca nie varta. «Praciahvajem pracu, čakajem, spadziajomsia i vierym. Inšapłanietniki nie pavinny nas padvieści», — žartuje błohier, jaki raniej kipieŭ šavinizmam. 

• 3
• 0
• 26
• 5
• 0
• 0
• 3
• 0