Łukašenka zaprasiŭ kiraŭnika Łaosa ŭ Biełaruś. Toj prapanavaŭ razam zdabyvać zołata
Alaksandr Łukašenka sustreŭsia ŭ Biškieku z prezidentam Łaosa Tchanhłunam Sisulitam i zaprasiŭ jaho naviedać Biełaruś. U adkaz kiraŭnik Łaosa prapanavaŭ biełaruskamu boku ŭdzielničać u zdabyčy karysnych vykapniaŭ i pabudavać u jaho krainie zavod pa pierapracoŭcy zołata.
Sustreča adbyłasia 1 vieraśnia na palach samitu Šanchajskaj arhanizacyi supracoŭnictva.
Łukašenka zajaviŭ, što Biełarusi i Łaosu varta bolš intensiŭna raźvivać adnosiny. Siarod mahčymych kirunkaŭ jon nazvaŭ mašynabudavańnie — nie tolki prodaž biełaruskaj techniki, ale i stvareńnie sumiesnych pradpryjemstvaŭ.
Jon taksama prapanavaŭ pieradavać Łaosu biełaruskija technałohii i navučać miascovych śpiecyjalistaŭ. Akramia taho, Biełaruś hatovaja pastaŭlać pradukty charčavańnia i prymać łaoskich dziaciej na azdaraŭleńnie.
U adkaz Tchanhłun Sisulit prapanavaŭ supracoŭnictva ŭ zdabyčy karysnych vykapniaŭ, pieradusim zołata.
«My možam supolna pracavać u halinie zdabyčy karysnych vykapniaŭ, zołata. My mahli b razam pabudavać zavod pa pierapracoŭcy zołata. Takoje pradpryjemstva ŭ nas užo jość, ale my možam pabudavać jašče adno. Nam vielmi chaciełasia b supracoŭničać z vami ŭ hetaj śfiery, u vas vielmi bahaty dośvied», — zajaviŭ kiraŭnik Łaosa.
Jon zaprasiŭ biełaruskich śpiecyjalistaŭ pryjechać u Łaos i vyvučyć inšyja mahčymyja kirunki supracoŭnictva.
«My čakajem inviestycyj ad Biełarusi. U nas šmat resursaŭ, i my hatovyja dzialicca prybytkam», — dadaŭ Sisulit.
Naprykancy sustrečy Łukašenka zaprasiŭ kiraŭnika Łaosa naviedać Biełaruś u zručny dla jaho čas.
Natalla Kalehava raskazała pra dapamohu biełaruskim uciekačam, svaju siamju, staŭleńnie da Cichanoŭskaj. I patłumačyła, chto takija «babry» i «zajcy»34
Kamientary