Čarhovaje zvalnieńnie ŭ Pientahonie: pajšoŭ u adstaŭku ministr VMS Džon Fiełan, jaki mieŭsia budavać «załaty fłot» Trampa

Aficyjny pradstaŭnik Ministerstva abarony Šon Parneł paviedamiŭ, što Fiełan nieadkładna pakidaje svaju pasadu i vykanaŭcam abaviazkaŭ ministra budzie jaho namieśnik Chunh Kao.

Pra adstaŭku Fiełana stała viadoma ŭ momant, kali praciahvajecca vajna ZŠA i Izraila suprać Irana (choć u joj abjaŭlena pieramirje), a amierykanskija vajenna-marskija siły praciahvajuć marskuju błakadu ŭ Armuzskim pralivie.

Donald Tramp zajaŭlaje, što błakada Irana budzie praciahvacca, adnak ułady hetaj krainy rasceńvajuć jaje jak parušeńnie pahadnieńnia ab pieramirji.

VMS ZŠA nie rastłumačyli, z čym źviazana zvalnieńnie Fiełana.

U pačatku krasavika Chiehsiet zvolniŭ načalnika štaba Suchaputnych vojskaŭ ZŠA Rendzi Džordža.

Paśla viartańnia Trampa ŭ Bieły dom svaich pasad pazbavilisia ŭžo bolš za 10 vysokapastaŭlenych vajennych, u tym liku staršynia Abjadnanaha kamiteta načalnikaŭ štaboŭ hienierał Čarlz Braŭn, načalnik štaba VMF admirał Liza Frankieci, namieśnik kiraŭnika štaba VPS hienierał Džym Słajf, i načalnik vajennaj raźviedki Džefry Kruz.

«Załaty fłot»: chto taki Fiełan i što pra jaho zvalnieńnie pišuć ŚMI

Fiełan nie źjaŭlajecca vajskoŭcam, da pryznačeńnia ministram VMS jon uznačalvaŭ pryvatny inviestycyjny fond u Fłarydzie.

Donald Tramp nazyvaŭ jaho «adnym z samych paśpiachovych biznesmienaŭ u krainie», nahadvaje New York Times.

«Jon napeŭna atrymaŭ hetuju pracu z najbolšym u historyi źnižeńniem zarpłaty, ale jon choča heta rabić, — kazaŭ Tramp na pres-kanfierencyi padčas pryznačeńnia Fiełana. — Jon choča adnavić naš Vajenna-marski fłot. I kab zrabić heta jak śled, patrebnyja mienavita takija mazhi».

Pavodle danych vydańnia, kali Fiełan byŭ kiraŭnikom VMS, jon zajmaŭsia stvareńniem «Załatoha fłotu», jaki pavinien być pabudavany ŭ vyniku značnych inviestycyj u novyja karabli, u tym liku liniejnych karabloŭ kłasa «Tramp».

Tramp kazaŭ, što ŭchvaliŭ budaŭnictva dvuch novych linkaraŭ, a ŭ pierśpiektyvie płanujecca pabudavać da 25. «Jany buduć samymi chutkimi, samymi vialikimi i, biezumoŭna, u 100 razoŭ mahutniejšymi za luby linkor, kali-niebudź pabudavany», — zajaŭlaŭ prezident ZŠA ŭ śniežni minułaha hoda.

Adnak, jak piša NYT sa spasyłkaj na nienazvanych čynoŭnikaŭ, praca Fiełana ŭ ministerstvie supravadžałasia kanfliktami z kiraŭnictvam Pientahona, u tym liku z Chiehsietam i z namieśnikam ministra abarony Styvienam Fajnbierham. Pryčynaj napružanych adnosin byli «styl mieniedžmientu, asabistyja roznahałośsi i inšyja pytańni», skazana ŭ publikacyi.

Krynicy CNN paviedamlajuć, što Fiełan kanfliktavaŭ z Chiehsietam užo niekalki miesiacaŭ. Pry hetym kiraŭnik Pientahona ličyŭ, što toj zanadta pavolna realizuje prahramu pa budaŭnictvie karabloŭ, — i taksama byŭ niezadavoleny pramymi kantaktami Fiełana z Trampam: ministr abarony rasceńvaŭ ich jak sprobu dziejničać praź jaho hałavu, skazana ŭ publikacyi CNN.

Pavodle danych CNN, Fajnbierh taksama choča kantralavać budaŭnictva karabloŭ, choć hetaja praca zvyčajna ŭvachodzić u zonu adkaznaści ministra VMS. Hetyja źviestki paćviardžajuć i surazmoŭcy NYT.

Pa źviestkach NYT haziety, u Fiełana taksama skłalisia napružanyja adnosiny z Chunham Kao, jaki staić našmat bližej da Chiehsieta, u tym liku pa sacyjalnych i kulturnych pytańniach.

• 0
• 0
• 2
• 1
• 1
• 0
• 0
• 0