Hałasavańnie «suprać» na refierendumie ab adnaŭleńni pieramoŭ pra ŭstupleńnie ŭ ES stała vyraznym palityčnym sihnałam Brusielu, što dla isłandskaha hramadstva ciažar členstva ŭ Jeŭrasajuzie pieravažaje jaho vyhady.
Isłandyja nie budzie adnaŭlać pieramovy ab ustupleńni ŭ Jeŭrasajuz. Na refierendumie 52,8% vybarcaŭ prahałasavali suprać, 47,2% — za. Sam refierendum tyčyŭsia nie niepasredna ŭstupleńnia ŭ ES, a adnaŭleńnia pieramoŭ, zamarožanych u 2013 hodzie.
Isłandyja i biez taho ciesna źviazanaja ź Jeŭrasajuzam praź Jeŭrapiejskuju ekanamičnuju prastoru i Šenhien. Tamu jaje dałučeńnie mahło b być davoli prostym. Adnak bolšaść vybarščykaŭ paličyła, što ryzyki dla nacyjanalnaha suvierenitetu pieravažvajuć mahčymyja vyhody.
Adnoj z hałoŭnych tem kampanii stała rybałoŭstva. Isłandcy aścierahajucca, što paśla ŭstupleńnia im daviadziecca padparadkoŭvacca ahulnaj rybałoŭnaj palitycy ES i častkova stracić kantrol nad adnoj z klučavych halin svajoj ekanomiki. Taksama hučali strachi nakont sielskaj haspadarki i pašyreńnia paŭnamoctvaŭ Brusiela ŭ ekanamičnaj palitycy.
Navat rost napružanaści ŭ Arktycy nie źmianiŭ nastroju bolšaści. Prychilniki ES spasyłalisia na zajavy Donalda Trampa pra Hrenłandyju i śćviardžali, što siabroŭstva ŭ Sajuzie dało b Isłandyi dadatkovyja harantyi. Ale dla vybarcaŭ hetyja arhumienty byli mienš važnymi za žadańnie zachavać samastojnaść.
Dla Brusiela vynik staŭ niepryjemnym sihnałam. ES ciapier imkniecca ažyvić palityku pašyreńnia. Ustupleńnie bahataj i stabilnaj Isłandyi mahło b pakazać, što siabroŭstva ŭ ES zastajecca pryvabnym nie tolki dla krain Uschodniaj Jeŭropy.
U hetym sensie isłandskaje «nie» nahadvaje rašeńni Narviehii, jakaja dvojčy — u 1972 i 1994 hadach — adchilała ŭstupleńnie ŭ ES. Tam taksama adnymi z hałoŭnych pryčyn byli suvierenitet i kantrol nad rybnymi resursami.
Pry hetym vynik refierendumu nie aznačaje, što isłandcy nastrojeny suprać Jeŭropy. Chutčej, jany ličać ciapierašniuju madel adnosin ź ES dastatkovaj i nie chočuć admaŭlacca ad častki nacyjanalnych paŭnamoctvaŭ.
Kamientary