«My abaviazanyja». Deputat Dziarždumy RF zaklikaŭ da jadziernaha ŭdaru
Rasii varta nanieści jadzierny ŭdar pa Ukrainie, kab vymusić jaje zdacca, zajaviŭ deputat Dziarždumy, lidar partyi «Radzima» Alaksiej Žuraŭloŭ. Na jaho dumku, «treba bić tak, kab vorah zrazumieŭ, što jon musić kapitulavać», piša The Moscow Times.
«Iduć dyskusii: ci možam my prymianiać taktyčnuju jadziernuju zbroju, ci nie možam. Słuchajcie, takoj dyskusii navat być nie pavinna! U vypadku nieabchodnaści my jaje abaviazanyja vykarystoŭvać… Treba budzie bić — budziem bić. I heta nie abmiarkoŭvajecca», — skazaŭ jon.
Raniej pra toje, što prezident Uładzimir Pucin rychtuje eskałacyju va Ukrainie i moža źviarnucca da taktyčnaj jadziernaj zbroi ŭ jakaści apošniaha srodku, kab nie dapuścić parazy ŭ vajnie, paviedamili blizkija da Kramla surazmoŭcy Bloomberg.
25 žniŭnia ŭ Maskvu niečakana prybyŭ dyrektar CRU ZŠA Džon Retklif. Krynicy Axios zajavili, što jon sprabavaŭ vyśvietlić, ci možna ŭtrymać Pucina ad eskałacyi i pierakanać jaho viarnucca da pieramoŭ pra zakančeńnie vajny.
The New York Times paviedamlała, što Retklif daŭ «zmročnuju acenku» pierśpiektyŭ rasijskaha vojska i ekanomiki i zaklikaŭ ukłaści pahadnieńnie, pakul nie stała zanadta pozna.
Paśla vizitu dyrektara CRU Rasija praviała vyprabavańni jadziernaj rakiety, jakaja dastaje da ZŠA, nazvu jakoj Minabarony nie raskryła.
Pakul prykmiet taho, što Pucin rychtujecca vykarystać jadziernuju zbroju, niama, adznačaŭ Bloomberg. Rezka suprać vystupajuć partniory Rasii, u tym liku Kitaj, jaki stroha pieraściaroh Kreml ad takoha kroku.
Pra nastupstvy jadziernaha ŭdaru Pucina papiaredžvała i administracyja eks-prezidenta ZŠA Džo Bajdena. Tady ŭ Biełym domie zajavili, što adkazam budzie kanviencyjny ŭdar amierykanskich Uzbrojenych sił pa Rasii, nahadała Fijona Chił, staršaja navukovaja supracoŭnica Brookings Institution, a ŭ minułym — daradčyca troch prezidentaŭ ZŠA.
Pucin, pavodle jaje słoŭ, praviaraje, jak daloka jon moža zaści, pierš čym ludzi jamu sastupiać.
Ciapier čytajuć
Natalla Kalehava raskazała pra dapamohu biełaruskim uciekačam, svaju siamju, staŭleńnie da Cichanoŭskaj. I patłumačyła, chto takija «babry» i «zajcy»19
Kamientary