Palčys: Ja suprać dapamohi tym palitviaźniam, chto ŭ źniavoleńni pracavaŭ na administracyju

«Niadaŭna Pavieł Vinahradaŭ vydaŭ pravilny post nakont dapamohi. Mahu paćvierdzić, što tak — prykładna takaja dapamoha plus-minus akazvałasia i mnie. Mahčyma, dzieści ja sam nie prajaŭlaŭ patrebnaj aktyŭnaści, bo mnie dahetul unutrana soramna prasić kahości. Plus Boh uznaharodziŭ mianie siabrami, jakich, napeŭna, ja nie zaŭsiody zasłuhoŭvaju: jany mohuć zadanacić, pazyčyć, dapamahčy pieražyć peŭnyja ciažkaści. Tamu ja časam śviadoma nie imknusia skarystacca niejkaj mahčymaściu atrymać dapamohu, kab resursy dastalisia tamu, kamu jany bolš patrebnyja.

Dla mianie niejak dziŭna, što ŭ 2026 hodzie mnohija nie viedajuć abo nie chočuć viedać pra Mižnarodny humanitarny fond i pra toje, jak jon pracuje. U niekatorych niejkija dziciačyja ŭjaŭleńni, što Śviatłana Cichanoŭskaja siadzić na miaškach z najaŭnymi, sama prahladaje ankiety i palčykam pakazvaje, kamu varta dapamahčy, a kamu nie.

U Vieniesuele, Mjanmie, Hruzii taksama za hetyja hady byli masavyja pratesty i emihracyja. Palitviaźni tysiačami siadziać u Jehipcie i na Kubie. Prykład sotniaŭ tysiač rasijskich emihrantaŭ — zusim pobač. Ale čamuści sadziejničańnie i dapamoha z boku Zachadu akazvajucca mienavita biełaruskim palitviaźniam. Mnohija dumajuć, što, vidać, prosta tamu, što jany sami pa sabie takija važnyja i Zachad razam sa svaimi padatkapłacielščykami ad naradžeńnia im niešta abaviazany.

Ja voś dahetul siadžu bieź jakich-niebudź dakumientaŭ, kartak i bankaŭskich rachunkaŭ. Banalna nie mahu zavieści sim-kartu na svajo imia. Kali ščyra — tak žyć vielmi niazručna. Ale ja i ciapier hatovy ad usiaho serca mocna abniać tych litoŭskich pamiežnikaŭ, jakija sustrakali nas 19 sakavika i afarmlali časovyja vizy.

Ciapier pra toje, što mahło b być lepš.

Pakolki jeŭrapiejskija srodki iduć u roznyja arhanizacyi i inicyjatyvy, im nie chapaje adzinaha punkta ŭvachodu. Niešta nakštałt umoŭnaha čat-bota albo sajta, kudy ty moh by napisać, i adrazu ŭsie 10 (umoŭna) pravaabarončych arhanizacyj i inicyjatyŭ viedali b pra ciabie i pačynali akazvać dapamohu. Pakul sistema pracuje naadvarot: ty pavinien napisać usim i banalna časam nie viedaješ, što, dzie i jak.

Druhoje — sapraŭdy jość momant «šancavańnia». Mianie vyvieźli amierykancy i akazali mnie dobruju dapamohu. Ale jość tyja, chto adsiedzieŭ poŭny termin i svaim chodam vyjechaŭ ź Biełarusi. Jość tyja, chto zastaŭsia ŭnutry RB. Jak efiektyŭna dapamahać hetym ludziam, jak pravaabaroncam razabracca, chto jość chto, — jašče taja prablema z zoračkaj.

Asabista ja suprać dapamohi tym, chto ŭ źniavoleńni śviadoma i sistemna pracavaŭ na administracyju na škodu inšym. Nie liču ich palitviaźniami.

Treciaje — heta ŭžo krychu ŭbok ad temy, ale asabista dla mianie heta važna. Nam treba dumać, jak sistemna arhanizavać dapamohu našym dobraachvotnikam, jakija prajšli vajnu i viarnulisia da zvyčajnaha žyćcia.

I tak, siarod rabotnikaŭ arhanizacyj, jakija dapamahajuć, jość nie tolki «chałodnyja». Ja asabista paznajomiŭsia z šeraham empatyčnych i vydatnych ludziej, jakija navat paśla hadoŭ akazańnia dapamohi jašče mohuć prajaŭlać ščyraść. Niahledziačy na ŭsiu vašu stomlenaść i vyharańnie — viedajcie, vy vialikija małajcy.

Chaču skazać: pakul peŭnaja asobnaja mrazota na hrošy rasijskich aliharchaŭ (naŭrad ci im hebnia płacić) sistemna atakuje ŭsiu temu dapamohi palitviaźniam, vielizarnaja kolkaść tych, chto adsiedzieŭ, cicha naładžvaje svajo žyćcio.

Im ciažka, ich całkam abnulili, u bolšaści razvalilisia siemji, a vakoł niama zvykłaha sacyjalnaha koła. Jany pieranosili katavańni, haładali i mierźli, miesiacami siadzieli ŭ ŠYZA. A ciapier nie nyjuć, čamuści vučacca, budujuć płany i navat dumajuć pra toje, jak u budučyni dapamahčy inšym.

Vam jość kim hanarycca, ale vy ich prosta nie zaŭvažycie, bo narmalnyja ludzi zanadta sumnyja dla miascovaj tusoŭki», — napisaŭ Eduard Palčys.

• 42
• 2
• 0
• 1
• 1
• 1
• 0
• 1