U Minsku znosiać «Viosku navukoŭcaŭ». Na jaje miescy vyraście prestyžny ŽK
Minčukoŭ znosam užo nie ździvić. Ciaham apošniaha hoda ŭ stalicy raźbirali, zdajecca, usio: zavody, damy i amal parachody. Da kanca viasny 2026‑ha technika dabrałasia da cichaha i biaskonca pryhožaha kutka stalicy — Łošyckaha zavułka, piša «Anłajnier».
Łošycki zavułak — serca tak zvanaj «Vioski navukoŭcaŭ». Kaliści tut i na jašče niekalkich vulicach, raźmieščanych pobač, budavali damy dla supracoŭnikaŭ Biełaruskaha navukova-daśledčaha instytuta pładavodstva, aharodnictva i bulbavodstva. Sam instytut bazavaŭsia ŭ Łošyckaj siadzibie.
Usiaho dla supracoŭnikaŭ instytuta było ŭźviedziena 10 damoŭ, kožny — na dźvie kvatery.
Za doŭhija-doŭhija hady navukoŭcy i ich naščadki abžyli vydzielenyja sotki, pieratvaryŭšy pustynnyja vułački ŭ sady, poŭnyja kviecieni.
Spakojnaje žyćcio nasielnikaŭ pryvatnaha siektara praciahvałasia da 2015 hoda, kali administracyja Leninskaha rajona ahučyła płany ab znosie «Vioski navukoŭcaŭ». Užo nie efiemiernyja, jak raniej, a całkam realnyja. Maŭlaŭ, stalica budzie «pierakrojvacca» na sučasny ład, i pryvatnamu siektaru ŭ takoj łakacyi rabić niama čaho. Na jaho miescy pavinna źjavicca šmatkvaternaja Łošyca-5.
Žychary «vioski» sprabavali zmahacca za mahčymaść zastacca ŭ svaich damach, navat padavali ŭ sud na Minharvykankam, ale, jak bačym, praz 11 hadoŭ pytańnie vyrašyłasia. I nie tak, jak chaciełasia b miascovym.
Užo niekalki dzion u Łošyckim zavułku haspadarać śpiectechnika i ludzi ź bienzapiłami. Rabočyja znosiać tyja samyja damy na dźvie kvatery i śpiłoŭvajuć duchmianyja sady z kviecieńniu.
Za tym, jak mianiajecca niekali cichaja i ŭtulnaja «Vioska navukoŭcaŭ», nazirajuć nie tolki miascovyja žychary, jakija pakul što zastajucca ŭ svaich damach. Kožny krok dakumientuje na kamieru smartfona 12‑hadovy chłopčyk Kola. Prosta ź cikavaści. Tamu što jamu nie ŭsio adno. Mahčyma, Kola vyraście i apublikuje maštabny narys pra hety kutočak Minska (z unikalnymi archiŭnymi kadrami).
A pakul huduć bienzapiły, a rabočyja vykonvajuć ahučany na dzień płan. Usio — dziela źjaŭleńnia ŭ budučyni Łošycy-5. Novaha i modnaha mikrarajona, raźmieščanaha prosta kala Łošyckaha parku. Naohuł padrychtoŭka terytoryi pad novy mikrarajon viadziecca z 2024-ha. Mienavita tady byli pieratvoranyja ŭ treski pieršyja siadziby.
Čaho čakać ad hetaj łakacyi ŭ budučyni? Na miescy siadzib, sadoŭ i damoŭ dla navukoŭcaŭ źjaviacca adrazu try kvartały.
Najbolš simpatyčnym i stylnym akažacca kutok, jaki prymykaje da parku (raźmieščany ŭzdoŭž vulicy Čyžeŭskich). Tut abiacajuć pabudavać damy nie vyšejšyja za 3—5 pavierchaŭ. Usio — pa indyvidualnych prajektach, heta značyć, abydziecca biez panelek (choć i jany mohuć być simpatyčnymi — dastatkova ŭspomnić «Anhlijski kvartał» abo zabudovu «Soniečnaha»).
Z druhoha boku, uzdoŭž budučaha 3‑ha transpartnaha kalca vyrastuć 7— 8‑paviarchovyja damy z ubudavana-prybudavanymi abjektami absłuhoŭvańnia i padziemnymi aŭtastajankami. U paŭdniovaj i paŭdniova-ŭschodniaj častkach rajona na skryžavańni mahistralnych vulic raźmieściacca niekalki architekturnych akcentaŭ vyšynioj da 14 pavierchaŭ. Architektary padkreślivajuć, što takaja vyšynia «nie parušyć usprymańnia abjektaŭ historyka-kulturnaj spadčyny i ŭpišacca ŭ achoŭnyja zony, pakolki miesca raźmiaščeńnia bolš vysokich budynkaŭ maksimalna addalena ad siadzibna-parkavaha kompleksu».
Usiaho ŭ Łošycy-5 uźviaduć 20 žyłych damoŭ (prykładna na 3130 kvater i 8 tysiač žycharoŭ), dziciačyja sady na 190 i na 230 miescaŭ, škołu i palikliniku dla darosłych.
U novym mikrarajonie chočuć «stvaryć indyvidualnyja žyłyja kompleksy ź niepaŭtornym abliččam, adroznym ad prylehłych mikrarajonaŭ». A taksama sfarmiravać piešachodny bulvar, jaki raźmieščany prykładna pa centry ŭsiaho mikrarajona i vyvodzić da Śvisłačy. Kali płany, ahučanyja jašče ŭ 2023-m, nie pamianialisia.
Pačać surjozna asvojvać placoŭku budaŭniki pavinny ŭžo sioleta.
U rajonie vulicy Majakoŭskaha ŭ Minsku źniasuć pryvatny siektar i pabudujuć try šmatpaviarchoviki
U Minsku źniasuć pryvatny siektar kala Śvisłačy ŭ Sierabrancy. Što budzie zamiest?
«Hory rastuć, nam potym hetym dychać». Žychary šmatpaviarchovika ŭ Łošycy niezadavolenyja «śniežnym susiedam»
Na miescy dvuchpaviarchovikaŭ 50‑ch hadoŭ u Minsku pabudujuć žyły kvartał
Ciapier čytajuć
Były biełaruski milicyjanier šukaje «parodzistuju pryhažuniu». Nazyvaje siabie miljanieram, a sam sudzicca z byłoj žonkaj za alimienty23
Kamientary