U Biełarusi prapanujuć dzikuju pasłuhu — pachavać žyŭcom u lesie. Kolki kaštuje?
Dzianis Usienka, jaki nazyvaje siabie śpiecyjalistam pa psichafizičnaj karekcyi, prapanuje duchoŭna raści pa-novamu — praz zakopvańnie žyŭcom. Što?
Šakujučuju praktyku Usienka pravodzić u Žabincy. Voś jak mužčyna tłumačyć sens zakapvańnia žyŭcom:
«U vas budzie ŭnikalnaja mahčymaść adpuścić/pachavać svoj bol, zaležnaści, słabaści, strachi i sastareły śvietapohlad. Heta sapraŭdy ŭnikalny mietad. Kolkaść miescaŭ abmiežavanaja».
Mietad Usienki nasamreč nie taki ŭžo i ŭnikalny. Pa sutnaści, heta praktyka trunaterapii, jakaja ŭžo prymianiajecca ŭ azijackich krainach i ŭ Rasii. Taho, chto žadaje praź jaje prajści, zažyva viazuć u morh, pieraapranajuć, kładuć u trunu, a potym mohuć i nienadoŭha zakapać u mahiłu. U 2025‑m adno ź biełaruskich rytualnych ahienctvaŭ užo sprabavała pryvieźci trunaterapiju ŭ krainu, ale pasłuhu admianili jašče da pieršaha klijenta.
Post mužčyny ŭ Threads nabraŭ sotni kamientaroŭ — i žartaŭlivych, i surjoznych. U kamientary pryjšoŭ bieraściejski ratavalnik i nahadaŭ pra sindrom praciahłaha ściskańnia. U ludziej, jakich na praciahły čas zavalvaje ziamloj abo niečym ściskaje (naprykład, padčas katastrof), arhanizm vyrablaje taksičnyja rečyvy, jakija paśla vyzvaleńnia čałavieka traplajuć u kryvatok. Heta moža skončycca atručvańniem arhanizma i vostraj nyrkavaj niedastatkovaściu.
Jość i inšyja aściarohi. U kamientarach pad pastom adznačyłasia psichołah — žančyna źviarnuła ŭvahu, što nieviadoma, jak arhanizm adreahuje na zakopvańnie:
«Paničnaja ataka zdarycca, psichijatryja ščoŭknie, infarkt raptoŭna… Moža być što chočaš».
Termabializna i 130 dalaraŭ
Žurnalistka źviazałasia ź Dzianisam pad vidam patencyjnaj klijentki i daviedałasia bolš pra praktyku. Adkazy śpiecyjalista pa transfarmacyi vyhladajuć jak nabor čyrvonych ściažkoŭ.
Praktyka raspačynajecca ŭ 17 hadzin u lesie, «dalej ad ściežak i čužych vačej».
«Zapalvaju rytualnaje vohnišča, [robim] padnašeńnie ducham lesu. Raźbiraju zapyt u vohnišča i vyvodžu ŭ sumlennaść», — piša Dzianis.
Čym dalej, tym cikaviej:
«Dalej vydaju rydloŭki, kapajem jamy. Ja ŭ hety momant zadaju pytańni, kapańnie ŭžo zapuskaje praces. Potym zapalvańnie paminalnaj ziemlanoj čornaj śviečki, potym zakopvańnie, ja dziažuru ŭ hety čas la vohnišča. Potym jość varyjanty — ja raskopvaju abo vy sami prabivajecie sabie šlach da śviatła».
Na ščaście, paŭnavartasnuju mahiłu Dzianis nie abiacaje.
«Jama kapajecca hłybinioj u 60‑70 sm, ja nie zasypaju vas ziamloj litaralna. U jamie vyściłajem paparaćciu, potym karamat, potym spalnik. Ja nakryvaju jamu spačatku toŭstymi halinami, potym jelnikam, potym bryzient. Na bryzient nasypajecca ziamla santymietraŭ 20, u nahach jość adtulina dla dostupu pavietra», — sprabuje jon supakoić klijentku.
U jakaści vyniku, piša Dzianis, možna čakać mocnyja transfarmacyi, pieramieny ŭ žyćci i ŭśviedamleńni, jakija «dahaniajuć jašče doŭha paśla praktyki».
Kaštuje heta ŭsio 130 dalaraŭ.
«U sumu ŭvachodzić całkam uvieś rytuał, ničoha z saboj nie treba brać, akramia źmiennaha adzieńnia i termabializny. Ad kamaroŭ, klaščoŭ, haračaja harbata — usio budzie».
Pytajemsia ŭ Dzianisa pra biaśpieku. Dakładna ničoha nie zdarycca? Zamiest raskazaŭ pra ryzyki Usienka koratka piša:
«Zdaroŭju nie pahražaje ničoha, inakš by takoje nie ładziŭ».
Zastajecca tolki vyśvietlić arhanizacyjnyja detali. Praktyki Dzianis ładzić u Žabincy, tamu što «tam miesca jość pravilnaje». Cikava, a praz kolki času nočču ŭ les pad Žabinkaj zmoža dajechać chutkaja, kali treba?
«Płanavać pryjezd treba prykładna ŭ 13 hadzin, kala 17 hadzin pačatak. Praktyka sychodzić u noč i doŭžycca da taho času, pakul vam budzie patrebna. Byvaje, što a čaćviortaj hadzinie ranicy skančvajem. Lepš płanavać adjezd nie raniej za siaredzinu nastupnaha dnia, kab vyspacca i pryjści ŭ siabie», — raskazvaje Dzianis.
Pa sutnaści, jon prapanuje pajechać ź im na noč u nieviadomaje miesca ŭ lesie. Vyhladaje niebiaśpiečna. Pytajemsia, ci možna chacia b uziać z saboj čałavieka ŭ jakaści padtrymki.
Dzianis adkazvaje, što zapyt razumieje, ale zadavolić nie moža:
«Taki čałaviek budzie adciahvać uvahu. I ci vytrymaje nie adśviečvać uvieś hety čas, nie kamunikavać, a być ubaku na palanie? Chadzić tudy-siudy budzie nielha, tam budzie važnaja kožnaja drobiaź».
Usienka, adnak, prapanuje kampramis. Akazvajecca, zakopvać buduć nie tolki vas, a i jašče dvaich čałaviek, to-bok havorka nie idzie pra toje, kab zastacca ŭ lesie ź im sam-nasam. Praŭda, moža ž akazacca, što tych čałaviek na miescy i nie budzie, tak? Jašče Dzianis prapanuje padčas rytuału trymać suviaź z čałaviekam, jaki pryviazie jaho klijentku na rytuał.
U kancy Usienka pytajecca, a čaho, ułasna, klijentka choča damahčysia tym zakopvańniem. Na prosty adkaz — treba zabycca na byłoha mužčynu — jon upeŭniena piša, što heta toje samaje, pasuje.
Pra zdaroŭje Dzianis ničoha nie pytajecca. Ci zmohuć u vypadku biady klijentu chutka dapamahčy — adkrytaje pytańnie.
«Naša Niva» — bastyjon biełaruščyny
PADTRYMAĆ
Sustreču Ryžankova ź Sikorskim paprasiŭ Minsk. Što kamanda Cichanoŭskaj abmiarkoŭvała z palakami da i paśla jaje11
Kamientary
U pryharadnych lasach šmat drennaha tvaryłasia ŭ 1930-40-yja. Padobnyja praktyki, tolki całkam surjozna i biez varyjantaŭ viarnucca. Možna adkapać i niečakanaje.