Muž Hanny Tyc — palak, jaki zahinuŭ na vajnie suprać Ukrainy. A jaje samuju vyhnali z Polščy za špijanaž.
U samaabvieščanaj Paŭdniovaj Asiecii ratavalniki znajšli cieła 52‑hadovaj hramadzianki RF Hanny Tyc (Zacharan). 21 maja jana ŭpała ŭ hornuju raku. Tolki praz try dni jaje cieła vyjavili za 35 kiłamietraŭ ad miesca zdareńnia.
Hanna Tyc prybyła ŭ rehijon u składzie zdymačnaj hrupy. Tam jana prezientavała svoj dakumientalny film pra miascovych žycharoŭ — udzielnikaŭ rasijskaj ahresii suprać Ukrainy.
Trahiedyja adbyłasia ŭnočy 21 maja. Hanna Tyc razam z kaleham znachodziłasia na padviesnym moście. Mužčyna ŭ jakaści žartu mocna razhajdaŭ kanstrukcyju — jany abodva sarvalisia ŭ vadu. Mužčynu ŭdałosia vyratavać, a žančynu paniesła imklivaj hornaj płyńniu.
U pošukavaj apieracyi ŭdzielničali bolš za 200 čałaviek, vykarystoŭvali BPŁA. Tolki praz try dni cieła ŭdałosia vyłavić.
Hanna pajšła z žyćcia vielmi chutka paśla svajho muža.
Jana była zamužam za palakam Ježy Tycam — toj muž zahinuŭ u minułym hodzie, vajujučy na baku RF suprać Ukrainy.
Ježy Tyc polski — prarasijski aktyvist i były vajskoviec. Byŭ zasnavalnikam tavarystva «Kursk», jakoje zajmałasia zachavańniem i adnaŭleńniem savieckich pomnikaŭ i vajskovych mohiłak u Polščy.
Pačynajučy z 2016 hoda Tyc rehularna jeździŭ u Maskvu, ź im asabista sustrakałasia Maryja Zacharava, aficyjnaja pradstaŭnica Ministerstva zamiežnych spraŭ Rasii. Jon rehularna źjaŭlaŭsia ŭ prapahandysckich rasijskich ŚMI.
Teležurnalistka Zacharan paznajomiłasia z budučym mužam u 2016 hodzie, kali źviarnułasia da Tyca pa dapamohu ŭ pošuku mahiły jaje dziaduli, jaki źnik bieź viestak paśla bajoŭ u Polščy padčas Druhoj suśvietnaj vajny. Paśla hetaha pamiž imi zaviazalisia blizkija stasunki.
U 2018 hodzie Hannu, jakaja na toj momant užo była žonkaj Tyca, zatrymała Ahienctva ŭnutranaj biaśpieki Polščy pavodle abvinavačańnia ŭ pahrozie biaśpiecy krainy i «arhanizacyi špijonskaj dziejnaści». Jaje departavali.
Tyc za žonkaju pierajechaŭ u Rasiju. Tam jon ustupiŭ u Rasijskaje histaryčnaje tavarystva, abvinavačvaŭ polskija ŭłady ŭ «sprobach falsifikacyi historyi», supracoŭničaŭ z prapahandaju.
U 2025 hodzie ŭstupiŭ u rasijskaje vojska dobraachvotnikam, kab vajavać suprać Ukrainy.
Pavajavaŭ jon zusim mała.
Pavodle źviestak adnaho z rasijskich telehram-kanałaŭ, Tyc źnik na ŭschodzie Ukrainy ŭ červieni 2025 hoda, a jaho reštki byli znojdzieny ŭ vieraśni.
Kamientary