«U nas jość akno dla pieramoŭ, pakolki kožny miesiac jany [rasijanie] buduć stračvać usio bolš ludziej, i praz heta jany straciać inicyjatyvu na poli boju».
Uładzimir Zialenski ličyć, što da nastupnaj zimy va Ukrainy jość «akno mahčymaściaŭ» dla pieramoŭ z Rasijaj ab zaviaršeńni vajny.
U intervju CBS News jaho paprasili prakamientavać zajavu bryhadnaha hienierała, kamandujučaha Trecim armiejskim korpusam Andreja Bileckaha pra toje, što Ukraina maje 6—9 miesiacaŭ dla taho, kab pierachapić inicyjatyvu na poli boju ŭ Rasii i ŭmacavać svaje pazicyi dla mirnych pieramoŭ, piša «Ukrainskaja praŭda».
Zialenski adkazaŭ: «Tak, heta praŭda». Pavodle jaho słoŭ, sa śniežnia 2025 hoda Rasija pačała stračvać inicyjatyvu na poli boju, i jon padzialiŭsia hetaj infarmacyjaj z amierykanskimi partniorami.
«U studzieni ja skazaŭ im [partnioram], što, na maju dumku, u nas jość akno dla pieramoŭ, pakolki kožny miesiac jany [rasijanie] buduć stračvać usio bolš ludziej, i praz heta jany straciać inicyjatyvu na poli boju.
Zaraz jany pačali atakavać nas masavanymi rakietnymi ŭdarami, i znoŭ ža, hałoŭnaja pryčyna, pa jakoj jany heta zrabili, u tym, što jany pačynajuć prajhravać na poli boju. Za miesiac jany nie zmahli akupavać bolš terytoryj, čym stracili ciaham taho ž miesiaca.
Tamu zaraz u nas jość hety pramiežak času pierad zimoj. Tamu ja liču, što… pierad zimoj nam treba znajści sposab, dypłamatyčny sposab, sieści i pahavaryć. Ale heta zaležyć ad cisku na Pucina, cisku ŭ jaho hramadstvie, i ja dumaju, što jon uzmacniajecca, cisku sankcyjami — nie admianiać ich, a ŭvodzić novyja. Heta dobra, heta dypłamatyčny šlach».
Razvažajučy pra toje, chto moža pradstaŭlać Jeŭropu na pieramovach ab miry va Ukrainie, Zialenski zhadaŭ «farmat z troch krain».
«Hetyja try krainy — heta Vialikabrytanija, Francyja i Hiermanija. Hetyja try krainy, na moj pohlad, mohuć vystupić u roli pieramoŭščykaŭ. Ale ŭ nas taksama jość dobryja partniory z krain Paŭnočnaj Jeŭropy, i, jak vy viedajecie, Turcyja zaŭsiody chacieła być pasiarednikam, i my navat zrabili niekalki paśpiachovych krokaŭ, kali viarnuli našych vajennapałonnych. Heta taksama vielmi važna. Ale chto budzie ŭ kancy? Vyrašać, chto heta budzie, pavinny Ukraina i Jeŭropa, i taksama važna, kab Rasija była hatovaja da pieramoŭ, da dyjałohu i da Jeŭropy», — dadaŭ prezident Ukrainy.
Kamientary