8000 rubloŭ za hod navučańnia. Samyja darahija śpiecyjalnaści ŭ VNU Minska

Onliner.by vyvučyŭ aktualny košt navučańnia ŭ minskich VNU i skłaŭ padborku samych darahich śpiecyjalnaściej dla pieršakurśnikaŭ. Cikava, što «ajcišnyja» śpiecyjalnaści nie apynulisia na viaršyni śpisu — dypłom dyzajniera abo ekanamista moža zapatrabavać jašče bolšych finansavych vydatkaŭ.

U padborku ŭvajšli dziaržaŭnyja ŭniviersitety Minska. Heta košt pieršaha hoda navučańnia — na nastupnych kursach jon časam mienšy. Nie ŭličvali BNTU i Biełaruskuju dziaržaŭnuju akademiju avijacyi, bo na momant publikacyi hetyja VNU jašče nie abviaścili košt navučańnia na 2026/2027 navučalny hod. U pryjomnych kamisijach paviedamili, što aktualnyja ceny stanuć viadomyja paźniej.

8083 rubli — piłoty

Stolki kaštuje pieršy hod navučańnia ŭ Biełaruskaj dziaržaŭnaj akademii avijacyi pa śpiecyjalnaści «Lotnaja ekspłuatacyja pavietranych sudnaŭ cyvilnaj avijacyi». Dla budučych piłotaŭ pieršy kurs — nie samy darahi: nastupnyja niekalki hadoŭ navučańnie kaštuje bolš za 60 000 rubloŭ za hod. Sioleta akademija płanuje pryniać 5 studentaŭ na biudžet i 2 — na płatnuju formu.

6669 rubloŭ — uschodaznaŭcy, dypłamaty i dyzajniery

Pierachodzim da samych darahich śpiecyjalnaściej Biełaruskaha dziaržaŭnaha ŭniviersiteta. Heta dźvie śpiecyjalnaści fakulteta mižnarodnych adnosin — «Mižnarodnaja kanfliktałohija» i «Mižnarodnyja adnosiny», «Uschodniaja fiłałohija» na fiłałahičnym fakultecie, a taksama ŭsie dyzajnierskija śpiecyjalnaści fakulteta sacyjakulturnych kamunikacyj.

6818 rubloŭ — jurysty i afrykanisty

Za takuju sumu možna navučacca na jurydyčnych śpiecyjalnaściach BDU: «Pravaznaŭstva», «Ekanamičnaje prava» na jurydyčnym fakultecie, a taksama «Mižnarodnaje prava» na fakultecie mižnarodnych adnosin. Ź minułaha hoda tut taksama rychtujuć śpiecyjalistaŭ pa krainach Afryki.

Paśla 4,5 hoda navučańnia vypuskniki atrymlivajuć kvalifikacyju «Afrykanist. Pierakładčyk» i mohuć pracavać u orhanach dziaržaŭnaha kiravańnia, dypłamatyčnych pradstaŭnictvach, biznes-strukturach i kulturnych ustanovach.

6554 rubli — ekanamisty

Za takuju sumu možna vybrać lubuju śpiecyjalnaść ekanamičnaha fakulteta BDU i ŭ budučyni stać mieniedžaram, bankaŭskim rabotnikam abo aŭdytaram. U novym navučalnym hodzie dla pieršakurśnikaŭ usie hetyja śpiecyjalnaści kaštujuć adnolkava.

5935 rubloŭ — bijołahi, palitołahi i žurnalisty

Takaja cana ŭstanoŭlena dla ŭsich śpiecyjalnaściej bijałahičnaha i žurnalisckaha fakultetaŭ BDU, a taksama dla šerahu inšych śpiecyjalnaściej. Naprykład, «Palitałohija» na jurydyčnym fakultecie, «Psichałohija», «Sacyjałohija» i «Sacyjalnyja kamunikacyi» na fakultecie fiłasofii i sacyjalnych navuk, a taksama «Sacyjalna-kulturny mieniedžmient i kamunikacyi» na fakultecie sacyjakulturnych kamunikacyj.

5900 rubloŭ — stamatołahi

Heta samaja darahaja śpiecyjalnaść Minskaha dziaržaŭnaha miedycynskaha ŭniviersiteta. Navučańnie pa inšych miedycynskich śpiecyjalnaściach abo na farmaceŭta abydziecca tańniej — 5000 rubloŭ na hod.

5727 rubloŭ — pierakładčyki i fiłołahi

Heta śpiecyjalnaści «Sučasnyja zamiežnyja movy» i «Pierakładčyckaja sprava» fakulteta sacyjakulturnych kamunikacyj BDU, a taksama «Ramana-hiermanskaja fiłałohija» na fiłałahičnym fakultecie. Vypuskniki mohuć pracavać linhvistami, pierakładčykami abo vykładčykami.

5458 rubloŭ — prahramisty i hieołahi

My dajšli da techničnych śpiecyjalnaściej, jakija mohuć stać asnovaj dla karjery ŭ IT. Amal 5,5 tysiačy rubloŭ kaštuje navučańnie ŭ BDU na śpiecyjalnaściach fakulteta radyjofiziki i kampjutarnych technałohij — «Kibierbiaśpieka», «Intelektualnaja elektronika», «Prykładnaja infarmatyka», a taksama na ŭsich śpiecyjalnaściach fakulteta prykładnoj matematyki i infarmatyki i pa profili «Kampjutarnaje madelavańnie i raspracoŭka veb-dadatkaŭ» fakulteta sacyjakulturnych kamunikacyj.

Taki ž košt majuć i šerah śpiecyjalnaściej hieahrafičnaha fakulteta: «Hieainfarmacyjnyja sistemy», «Hidramietearałohija», «Kasmaaerakartahrafija i hieadezija», «Hieatechnałohii turyzmu i ekskursijnaj dziejnaści», «Krainaznaŭstva i pierakładčyckaja dziejnaść».

5414 rubloŭ — ekanamisty i łahisty

Stolki kaštuje pieršy hod navučańnia na ŭsich śpiecyjalnaściach Instytuta biznesu BDU. Takaja adukacyja adkryvaje mahčymaści dla kiravańnia biznesam, a taksama pracy ŭ śfierach ekanomiki i łahistyki.

5250 rubloŭ — jašče ajcišniki

Zamykajuć padborku try samyja darahija fakultety BDUIR: fakultet kampjutarnych sistem i sietak, fakultet infarmacyjnych technałohij i kiravańnia, a taksama inžynierna-ekanamičny fakultet. Navučańnie na pieršym kursie pa ŭsich śpiecyjalnaściach hetych fakultetaŭ kaštuje adnolkava — 5250 rubloŭ za hod.

• 0
• 0
• 0
• 1
• 0
• 0
• 0
• 0