Namieśnik pamočnika dziaržaŭnaha sakratara ZŠA pa spravach Uschodniaj Jeŭropy Krystafier Śmit u najbližejšy čas pakinie svaju pasadu. Hety dypłamat kuryruje ŭ Dziarždepartamiencie biełaruski kirunak, niekalki razoŭ prylataŭ u Minsk dla pieramovaŭ z Alaksandram Łukašenkam i ŭdzielničaŭ u vyzvaleńni palitviaźniaŭ.
Infarmacyju pra chutki sychod Krystafiera Śmita z pasady namieśnika pamočnika dziaržsakratara pa spravach Uschodniaj Jeŭropy «Lusterku» paćvierdzili dźvie nie źviazanyja pamiž saboj krynicy, znajomyja ź situacyjaj.
Pavodle adnoj ź ich, dypłamat praciahnie svaju prafiesijnuju karjeru ŭ Małdovie, ale, imavierna, nie ŭ strukturach Dziaržaŭnaha departamienta.
Krystafier Śmit — karjerny supracoŭnik vyšejšaha źviana dypłamatyčnaj słužby ZŠA. Pasadu namieśnika pamočnika dziaržaŭnaha sakratara pa spravach Uschodniaj Jeŭropy jon zajmaje ź lipienia 2023 hoda. Śmit vałodaje ruskaj i tureckaj movami. U 2022—2023 hadach jon byŭ namieśnikam kiraŭnika misii ŭ pasolstvie ZŠA ŭ Kijevie.
Na biełaruskim kirunku Śmit staŭ adnym z klučavych amierykanskich dypłamataŭ. U śniežni 2023 hoda jon zajaŭlaŭ, što «vielmi sumna nazirać za tym, jak [Łukašenka] rasparadžajecca Biełaruśsiu dziela dasiahnieńnia svaich ułasnych karyślivych metaŭ», i padkreślivaŭ, što ZŠA hatovyja padtrymać demakratyčnyja siły ŭ pryciahnieńni Łukašenki da adkaznaści za pieramiaščeńnie ŭkrainskich dziaciej.
«Lusterka» spytała ŭ dypłamatyčnaha daradcy Śviatłany Cichanoŭskaj Dzianisa Kučynskaha, ci viadoma biełaruskim demakratyčnym siłam pra mahčymy sychod Śmita z pasady.
Surazmoŭca adznačyŭ, što amierykanski dypłamat pracuje na hetaj pasadzie ŭžo try hady, tamu ratacyja była b naturalnaj i adpaviadała b zvyčajnaj kadravaj praktycy. Pry hetym Kučynski padkreśliŭ, što nie moža ni paćvierdzić, ni abvierhnuć infarmacyju «Lusterka».
— Što ja mahu skazać z upeŭnienaściu, dyk heta toje, što dzie b spadar Śmit ni praciahnuŭ svaju słužbu, Biełaruś zastaniecca ŭ jahonym sercy. Jon — adzin z samych addanych, vopytnych i daśviedčanych pradstaŭnikoŭ ułady ZŠA, jakija pracujuć pa Biełarusi i rehijonie ŭ cełym, i my ščyra ŭdziačnyja jamu za jaho addanaść spravie i padtrymku na praciahu ŭsich hetych hadoŭ, — zajaviŭ daradca Cichanoŭskaj.
Chto taki Krys Śmit i čym jon zajmaŭsia na biełaruskim kirunku
Z aktyvizacyjaj dyjałohu pamiž Vašynhtonam i Minskam u 2025 hodzie Krys Śmit staŭ adnym z hałoŭnych pieramoŭščykaŭ.
U lutym 2025 hoda jon udzielničaŭ u apieracyi pa vyvazie ź Biełarusi dvuch palityčnych źniavolenych i adnaho hramadzianina ZŠA. Dypłamat uvachodziŭ u skład hrupy, jakaja prylacieła ŭ Minsk, dzie sustrełasia z Alaksandram Łukašenkam i staršynioj KDB Ivanam Ciercielem.
Kamientujučy hetaje vyzvaleńnie, Śmit zajaviŭ, što heta byŭ «adnabakovy žest z boku ŭładaŭ Łukašenki» i što toj «ničoha nie atrymaŭ uzamien».
Sam Łukašenka taksama publična zhadvaŭ amierykanskaha dypłamata. U sakaviku 2026 hoda, kažučy pra pieramovy z ZŠA, jon adznačyŭ, što «hałoŭnuju rolu adyhryvaŭ i ciapier, napeŭna, adyhryvaje Śmit».
U Ofisie Śviatłany Cichanoŭskaj Krystafiera Śmita nazyvali «samym paśladoŭnym partnioram u ZŠA». Pavodle słoŭ daradcy Cichanoŭskaj Dzianisa Kučynskaha, u 2024—2025 hadach u ich adbyłosia vosiem asabistych sustreč z amierykanskim dypłamatam u Vilni i Vašynhtonie.
Ciapier čytajuć
Ukraina ŭpieršyniu adkazała na rasijskija ataki na składy «Novaj pošty» simietryčnymi ŭdarami pa chabach «Vajłdbieryz». Padmaskoŭny zhareŭ daščentu1111
Kamientary