Žančyna-kurjer viezła ź Biełarusi ŭ Rasiju ŭ maršrutcy 100 tysiač jeŭra i, naturalna, nie daviezła
Zahadkavaja historyja z abrabavańniem, charakternaja dla amierykanskaha Dzikaha Zachadu XIX stahodździa, zdaryłasia na biełaruska-rasijskim pamiežžy ŭ kancy 2025 hoda.
Žančyna-kurjer pavinna była dastavić z Barysava ŭ Maskvu bolš za 100 tysiač jeŭra i 11 tysiač dalaraŭ. Hrošy jana viezła ŭ maršrutcy, paviedamlaje Onliner.by.
Pavodle viersii śledstva, troje mužčyn zahadzia damovilisia skraści hrošy. Adzin ź ich supravadžaŭ kurjera i viedaŭ pra pieravozku bujnoj sumy. Jon pieradavaŭ suŭdzielnikam infarmacyju pra maršrut i prypynki. Druhi jechaŭ śledam na aŭtamabili i pavinien byŭ dapamahčy ŭciačy. Treci pavinien byŭ praniknuć u mikraaŭtobus i zabrać hrošy.
Spačatku dvoje mužčyn pasprabavali skraści hrošy na zapraŭcy ŭ Barysaŭskim rajonie, ale nie zmahli hetaha zrabić i pajechali za mikraaŭtobusam u Smalenskuju vobłaść.
Na adnoj z zapravačnych stancyj u Kraśninskim rajonie kurjer i jaje supravadžajučy zajšli ŭ kaviarniu. Tady treci ŭdzielnik zajšoŭ u mikraaŭtobus, zabraŭ upakoŭku z valutaj i źjechaŭ razam z suŭdzielnikam.
Paźniej mužčyny viarnulisia ŭ Biełaruś i ŭ lesie padzialili skradzienyja hrošy. Pavodle źviestak śledstva, adzin z udzielnikaŭ taksama raskazaŭ, što častka hrošaj pieradavałasia za vydaleńnie zapisaŭ z kamier videanazirańnia.
Znajści ŭsich traich dapamahli zapisy z kamier, danyja ab telefonnych złučeńniach i pieramiaščeńni aŭtamabilaŭ, a taksama pierapiska. Pry zatrymańni ŭ adnaho z mužčyn znajšli telefon, jaki, jak miarkuje śledstva, vykarystoŭvaŭsia dla suviazi z suŭdzielnikami ŭ dzień kradziažu.
Dvoje abvinavačanych pryznali vinu i raskazali, jak rychtavali i ździajśniali kradziež. Treci svaju datyčnaść admaŭlaje i ad dačy pakazańniaŭ admoviŭsia.
Abvinavačanym 22, 37 i 49 hadoŭ. Dvoje raniej nie pryciahvalisia da kryminalnaj adkaznaści. 37‑hadovy žychar Barysava maje nieadbytuju i niaźniatuju sudzimaść. Im vystaŭlenyja roznyja abvinavačvańni.
Kamientary