U Dzień maci mamu Ksiušy z SMA pazbavili baćkoŭskich pravoŭ

Pa ironii losu sud pastaviŭ kropku ŭ dramatyčnaj historyi mienavita ŭ Dzień maci. «Sudom było pryniataje rašeńnie ab pazbaŭleńni mianie baćkoŭskich pravoŭ. Budu praciahvać zmahacca za svaich dziaciej», — łakanična paviedamiła Nina Sańkova tym, chto joj dapamahaŭ.

Atrymlivajecca, što čatyrochhadovaja Ksiuša zastaniecca ŭ domie dziciaci, kudy dziaŭčynku ŭ svoj čas addała sama maci. Adna ź jaje starejšych siaścior žyvie ŭ svajho baćki, jašče adna siastra z małodšym bratam znachodziacca pad apiekaj u inšaj siamji.

Sprava ŭ tym, što čaćviora dziaciej naradzilisia ad troch roznych mužčyn: adzin źnik, jašče kali Nina była ciažarnaj pieršy raz, a baćka Ksiušy i jaje brata skončyŭ žyćcio samahubstvam, kali dačce pastavili ciažki dyjahnaz.

Pavialičyć

Jak ni dziŭna, šmat chto z vałancioraŭ ličyć rašeńnie pazbavić Ninu Maisiejenka baćkoŭskich pravoŭ spraviadlivym. Jany nie vierać u toje, što žančyna sapraŭdy hatova vypraŭlacca i stać adkaznaj maci.

Śćviardžajuć, što sama žančyna nie vielmi imknułasia kamunikavać sa svaimi dačkami i synam. Prybiralisia ŭ jaje domie i pryvodzili jaho ŭ boski vid nieabyjakavyja ludzi. Pry hetym, kažuć, navat paśla ramontu žančyna ŭmudrałasia rabić biesparadak znoŭ i znoŭ. 

Vałanciory ž źbirali i rečy dla ŭsich dziaciej Niny na toj vypadak, kali ich viarnuć da maci. Ciapier chvalujucca, kab usio sabranaje maci sapraŭdy addała dziaŭčynkam i chłopčyku.

Taksama, na rachunku Niny zastajecca jašče davoli vialikaja suma hrošaj, sabranych dla Ksiušy. Zhodna z novym ukazam №304 «Ab fondach i dabračynnaj dziejnaści ŭ śfiery achovy zdaroŭja», u takich vypadkach zališnija hrošy na praciahu troch miesiacaŭ treba pieraličyć na dabračynnyja rachunki inšych asob, na jakija zbor jašče praciahvajecca.

Pa infarmacyi «Našaj Nivy», amal usie śviedki ŭ sudzie vystupali suprać taho, kab adnavić Ninu Sańkovu ŭ baćkoŭskich pravach. Starejšyja dziaŭčynki skazali, što nie chočuć žyć z maci i hatovyja tolki chadzić da jaje ŭ hości.

Z čatyrochhadovaj Ksiušaj usio bolš składana. Choć jana i źviartajecca da maci vyklučna pa imieni, dziaŭčynka lubić Ninu. Kožny raz žančyna davała dačce abiacańnie, što nastupnym razam zabiare jaje z domu dziciaci — i Ksiuša ŭ heta vieryła i čakała.

Ź inšaha boku, ciapier Ksiušu možna budzie aficyjna ŭdačaryć — kali znojdziecca siamja, hatovaja heta zrabić. 

Nahadajem, pra Ksiušu Maisiejenka biełarusy pačuli sioleta, dziakujučy vałancioram. Tyja daviedalisia pra trochhadovuju dziaŭčynku z SMA, jakaja žyvie ŭ dziciačym domie ŭ Mahilovie. Jana była amal pazbaŭlenaja šansaŭ na vyratavańnie — u adroźnieńnie ad inšych dziaciej z takoj ciažkaj chvarobaj za Ksiušu nie było kamu zmahacca.

Pavialičyć

Sabrać $1,8 miljona na vyratavalny ŭkoł samych darahich lekaŭ u śviecie — vielmi składanaja zadača dla luboj biełaruskaj siamji. A što kazać pra dzicia, jakoje zastałosia sam-nasam z prablemaj?

Ale nieabyjakavyja ludzi pačali pijaryć zbor na Ksiušu. U vyniku kaśmičnuju sumu ŭdałosia sabrać za rekordny čas — za miesiac. Nivodzin padobny zbor u historyi Biełarusi nie adbyvaŭsia nastolki chutka.

Maci dziaŭčynki zajaviła, što choča viarnuć dziaciej i samastojna hadavać ich — ale ž pytańniaŭ da jaje było zašmat.

Sudovaje pasiadžeńnie ab pazbaŭleńni Niny Sańkovaj baćkoŭskich pravoŭ musiła adbycca jašče ŭ krasaviku — ale ž tady praces aficyjna pastavili na paŭzu, kab Ksiuša zmahła spakojna atrymać vyratavalny ŭkoł Zolgensma. Maci była ź joj u RNPC «Maci i dzicia» ŭ toj składany momant.

Paśla taho, jak ukoł byŭ zrobleny, Ksiuša viarnułasia ŭ dziciačy dom, a pracedura pazbaŭleńnia baćkoŭskich pravoŭ zapuščanaja — novyja sudovyja pasiadžeńni pačalisia ŭ vieraśni. 

Nina šukała dapamohi i zapisała videazvarot. Ščyra pryznavałasia, što viedaje: hramadstva jaje asudžaje i ličyć žudasnaj maci, ale prasiła parazumieńnia.

«Ja nie śviataja, ale ŭ mianie nie było padtrymki i nadziejnaha plača pobač. U mianie nie było takoha prykładu, ale ja vučusia. Ja słuchaju parady ludziej, jakija mnie dapamahajuć, padtrymlivajuć… I ja vielmi chaču navučycca žyć pravilna».

• 6
• 0
• 2
• 2
• 0
• 13
• 0
• 0