Narviehija źbirajecca dazvolić svajmu suvierennamu fondu dabrabytu inviestavać u stvareńnie jadziernaj zbroi

Zhodna ź dziejnymi normami, fond nie inviestuje ŭ 14 kampanij, jakija raspracoŭvajuć abo vyrablajuć jadziernuju zbroju ci jaje kampanienty. Siarod ich — bujnyja mižnarodnyja vytvorcy ŭzbrajeńniaŭ Airbus, BAE Systems, Boeing, Lockheed Martin i Safran.

U listapadzie minułaha hoda ŭrad Narviehii daručyŭ pierahledzieć hetyja abmiežavańni. Kamisiju ŭznačaliŭ były kiraŭnik narviežskaha Centralnaha banka Śviejn Jodrem.

Pavodle prapanavanych źmien, fond zmoža ŭkładać srodki ŭ vytvorcaŭ jadziernaj zbroi, kali jany znachodziacca ŭ krainie, jakaja aficyjna vałodaje jadziernaj zbrojaj, pryznanaja takoj u adpaviednaści z Damovaj ab nieraspaŭsiudžvańni jadziernaj zbroi i adnačasova źjaŭlajecca sajuźnikam Narviehii pa NATA.

Jak patłumačyŭ Jodrem, heta dazvolić viarnuć u inviestycyjny partfiel niekalki brytanskich, francuzskich i amierykanskich vytvorcaŭ uzbrajeńniaŭ.

Inšyja etyčnyja abmiežavańni zastanucca ŭ sile. Jany tyčacca vytvorčaści bijałahičnaj i chimičnaj zbroi, supraćpiachotnych min i kasietnych bojeprypasaŭ, a taksama inviestycyj u vuhalnuju pramysłovaść, tytuniovy biźnies i industryju kanabisu.

Dakład kamisii pieradali ministru finansaŭ Narviehii Jensu Stołtenbierhu, jaki raniej zajmaŭ pasadu hienieralnaha sakratara NATA. Jon źviarnuŭ uvahu na supiarečnaść: narviežski fond nie moža inviestavać u kampanii, jakija mohuć mieć vyrašalnaje značeńnie dla biaśpieki krainy, u toj čas jak Rasija ŭsio čaściej pahražaje vykarystańniem jadziernaj zbroi, a Kitaj naroščvaje svoj jadzierny arsienał.

Kamisija taksama prapanavała źmianić paŭnamoctvy Rady pa etycy — niezaležnaha orhana, jaki daje rekamiendacyi Centralnamu banku Narviehii, što kiruje fondam. Rada pa-raniejšamu budzie aceńvać ryzyku surjoznych parušeńniaŭ etyčnych standartaŭ kampanijami, ale bolš nie zmoža samastojna rekamiendavać vyklučeńnie ich akcyj ź inviestycyjnaha partfiela. Heta paŭnamoctva ŭžo prypynienaje na čas pierahladu pravił.

Prapanavanyja źmieny vyniesuć na hramadskaje abmierkavańnie, jakoje praciahniecca da 15 studzienia. Paśla hetaha ŭrad płanuje pradstavić svaju acenku parłamientu viasnoj nastupnaha hoda.

Dakład užo vyklikaŭ krytyku z boku šerahu palityčnych partyj, asabliva levych. Adzin z pradstaŭnikoŭ partyi zialonych nazvaŭ jaho «całkam pazbaŭlenym sensu».

Narviežski fond inviestuje bolš čym u 7 tysiač kampanij pa ŭsim śviecie i vałodaje prykładna 1,5% usich akcyj, jakija abaračajucca na biržach.

• 2
• 0
• 0
• 0
• 0
• 0
• 0
• 0