«U basiejnach stojačy miesca niama». Minčuki rvanuli na plažy i ŭ akvazony — i zastalisia rasčaravanyja
Anamalnaja śpioka, jakaja nakryła Biełaruś u minułyja vychadnyja, prymusiła tysiačy minčukoŭ šukać ratavańnia kala vady. Adnak adpačynak na papularnych płatnych plažach i ŭ akvaparkach dla mnohich abiarnuŭsia rasčaravańniem. U sacsietkach karystalniki masava skardziacca na pierapoŭnienyja zony adpačynku, adsutnaść svabodnych šezłonhaŭ, doŭhija čerhi i niemahčymaść navat znajści miesca, kab raźmiaścicca na ručniku, piša «Anłajnier».
Pavodle mierkavańnia naviedvalnikaŭ, niekatoryja placoŭki akazalisia prosta nie hatovyja pryniać takuju kolkaść haściej. Zrazumieła, što «chto pieršy ŭstaŭ — taho i tapki», i pryjści ŭlehčysia na lubym z sotni volnych miescaŭ a dziaviataj hadzinie ranicy nichto nie zabaraniaŭ (hetym taksama paryravali ŭ kamientaryjach), ale rasčaravańnie ŭžo nikudy nie dzienieš.
Karystalnica Threads ermi_1415 raskazała pra naviedvańnie akvaparka «Lebiadziny», dzie, pavodle jaje słoŭ, užo nieŭzabavie paśla adkryćcia praktyčna nie zastałosia volnych miescaŭ.
«Chłopcy i dziaŭčaty, vy što tvorycie? Takoha prynižeńnia ja nie adčuvała vielmi daŭno. Ja razumieju, na vulicy śpioka i šmat ludziej chočuć achałazicca. Ale ž usiamu jość miaža», — napisała dziaŭčyna.
Minčanka śćviardžaje, što volnych šezłonhaŭ nie było ni ŭ pamiaškańni, ni na vulicy, usie ciubinhi dla horak akazalisia zaniatyja, a na prośbu padać adzin ź ich instruktar nibyta adkazaŭ: «Šukajcie dzie chočacie».
Taksama naviedvalnica śćviardžaje, što va ŭstanovie skončylisia pitnaja vada i kvas, a basiejny byli nastolki pierapoŭnienyja, što ŭ ich «navat stojačy miesca niama». U vyniku, pravioŭšy ŭ akvaparku kala 35 chvilin, siamja vyrašyła pajści, adnak viarnuć hrošy za astatni čas adpačynku, pavodle słoŭ dziaŭčyny, joj admovilisia.
Nie mienš pretenzij akazałasia i da płatnaha plažu na race Pcič. Naviedvalniki raskazvajuć, što ŭžo na ŭvachodzie ich papiaredzili pra adsutnaść svabodnych šezłonhaŭ, adnak realnaja situacyja akazałasia značna horšaj.
«Plaž vielmi maleńki, ludziej da chalery, i navat z ručnikom lehčy nierealna. My prajšli trochi dalej — zona piasku skončyłasia, pačalisia kamiani i halinki. Pryjšłosia ŭžo lehčy tam, bo mahčymaści źjechać nie było», — padzialiłasia vikki_nikiforovich.
Pavodle jaje słoŭ, abstalavany ŭvachod u vadu akazaŭsia zusim nievialikim i raźličany pieravažna na dziaciej, tady jak bolšaści adpačyvalnikaŭ prychodziłasia zachodzić u raku pa kamianiach.
Padobnymi ŭražańniami padzialiłasia i inšaja biełaruska ŭ kamientaryjach da pasta.
«My taksama pryjechali siońnia, i nam taksama skazali, što šezłonhaŭ niama. Dajšli da hetaha «plažu» i zrazumieli, što tam nie toje što pakryvała razłažyć — tam navat prysieści niama dzie. U vyniku raźviarnulisia i pajechali», — raskazała jana.
Žančyna taksama adznačyła, što pry kupli kvitka naviedvalnikaŭ nie papiaredžvali pra faktyčnuju pierapoŭnienaść plažu.
Jašče adna adpačyvalnica jjuli.iia źviarnuła ŭvahu na stan dna ŭ zonie dla kupańnia.
«Što heta za miesca dla kupańnia, pa płoščy jak dziciačy basiejn? Kali tudy pojduć kupacca adrazu ŭsie ludzi, jakija pryjechali na plaž, to tam navat miesca akunucca nie budzie. Heta narmalna, što na abstalavanym miescy dla kupańnia pad nahami vielizarnyja vostryja kamiani i niejkija šyny?» — aburyłasia dziaŭčyna.
Abmierkavańni vyklikaŭ i plaž sanatoryja «Viesta», naviedvańnie jakoha kaštuje 60 rubloŭ za ŭvieś dzień. Karystalnica yuliya0x paraŭnała rekłamnyja fatahrafii z tym, što ŭbačyła na miescy, adznačyŭšy, što svabodnych šezłonhaŭ praktyčna nie zastałosia adrazu paśla adkryćcia.
U sanatoryi pryznali, što ŭ vychadnyja sutyknulisia ź biesprecedentnaj kolkaściu naviedvalnikaŭ.
«Na žal, ale ažyjataž vakoł plažu ŭ hetyja vychadnyja sapraŭdy pieravysiŭ jaho jomistaść: usie šale i šezłonhi byli zaniatyja. Uličvajučy heta, było pryniata rašeńnie puskać achvotnych na zialonuju zonu za pałovu cany», — prakamientavali pradstaŭniki «Viesty».
Taksama čytačka «Anłajniera» Kaciaryna raskazała, što ŭ minułyja vychadnyja naviedała SAC «Alimpijski» i zastałasia rasčaravanaja arhanizacyjaj adpačynku. Pavodle jaje słoŭ, košt dzionnaha naviedvańnia vyras da 60 rubloŭ, adnak, jak ličyć minčanka, za hetyja hrošy naviedvalniki atrymlivajuć tolki mahčymaść raźmiaścicca na hazonie.
«Šezłonhaŭ zaŭsiody niama, narodu vielmi šmat, adzin basiejn-«lahušatnik», jaki ŭ pramym sensie kišyć ludźmi», — raskazała Kaciaryna.
Jana taksama adznačyła, što pacikaviłasia ŭ supracoŭnikaŭ, čamu pry pavieličeńni koštu biletaŭ nie było zakuplena bolš šezłonhaŭ. Pavodle słoŭ žančyny, joj adkazali: «Vas nichto nie prymušaje».
«Stała vielmi kryŭdna. Viadoma, nichto nie prymušaje, ale ŭ miežach Minska letam praktyčna niama kudy pajści. Atrymlivajecca, albo siadzieć doma ŭ śpioku, albo płacić niemałyja hrošy prosta za ŭvachod bieź jakich-niebudź vyhod», — padzialiłasia čytačka.
Kaciaryna dadała, što z padobnaj prablemaj sutykałasia i ŭ minułym hodzie. Tady jana pakinuła skarhu praz sajt kompleksu, adnak, pavodle jaje słoŭ, adkazu tak i nie atrymała.
Za kamientaryjem pa situacyi ŭ SAC «Alimpijski» źviarnuŭsia i žurnalist «Anłajniera». Jamu paŭtaryli prykładna toje ž samaje: kančatkovaje rašeńnie adnosna taho, ci zastavacca adpačyvać na terytoryi kompleksu, prymaje sam hość. Jak udakładnili pradstaŭniki SAC, na jaho pryniaćcie jość 15 chvilin navat paśla kupli kvitka i traplańnia na terytoryju. Kali za hety čas čałaviek adčuŭ dyskamfort, možna viarnuć hrošy i pajści.
«Infarmacyja pra toje, što kolkaść šezłonhaŭ abmiežavanaja, jość kala kožnaj kasy, asobna heta prahavorvajuć i kasiry pry prodažy ŭvachodnaha kvitka. U nas taksama dazvolena prychodzić sa svaimi pledami, ručnikami. Darečy, u minułyja vychadnyja zahruzka akvazony nie była hraničnaj: pakul što zafiksavany maksimum — 1400 adpačyvalnikaŭ. U papiarednija hady, zdarałasia, prymali i pa 3000 naviedvalnikaŭ».
Kamientary