Усю ўладу трымае данецкі клан
Цяпер выхадцы з Данецка займаюць усе найвышэйшыя пасады ва Украіне: прэзідэнта (Януковіч), прэм'ерам быў данецкі Азараў, а цяпер яго абавязкі выконвае данецкі Арбузаў, спікера Вярхоўнай Рады (Рыбак), кіраўніка Адміністрацыі прэзідэнта (Клюеў), генпракурора (Пшонка), кіраўніка СБУ (Якіменка) і міністра ўнутраных спраў (Захарчанка).
Карупцыя пранізала дзяржаву
«Гэта бандыцкі рэжым, які раскраў у краіне ўсё, што можна раскрасці. Галасы куплялі, суддзяў куплялі! А хто не прадаваўся, тых знішчалі, — усхвалявана казаў на Майдане карэспандэнту «Нашай Нівы» Юрый, студэнт кіеўскага Універсітэта тэатра, кіно і тэлебачання імя Карпенкі-Карага. — Нам зараз няма дарогі назад. Або яны, або мы. Яны ўсіх нас знішчаць, калі перамогуць», — мяркуе ён.
«Гэта не прэзідэнт, які накраў столькі, што збудаваў сабе палац і зрабіў сыноў мільярдэрамі!» — кажа ён. І «Беркут» для Юрыя — ніякая не міліцыя, а «платныя наёмнікі зажратых алігархаў», што выссалі з найбагацейшай краіны апошнія сокі.
Асаблівае абурэнне ўкраінцаў выклікала пабудова Януковічам прыватнай рэзідэнцыі Міжгор'е на 140 гектараў. Толькі будматэрыялы для яе каштавалі 9,5 мільёна даляраў. Французскія журналісты раскапалі, што толькі адзін з санвузлоў яе, упрыгожаны каштоўнымі камянямі, каштаваў 350 тысяч еўра.
Пры гэтым Украіна застаецца на другім месцы з канца ў Еўропы па памеры сярэдняга заробку.
Апазіцыя прадракала Януковічу, які ў маладосці сядзеў за дробныя крадзяжы, лёс румынскага дыктатара Нікалае Чаўшэску.
Каментары