У Тураве (Жыткавіцкі раён Гомельскай вобласці) 28 верасня адбудзецца пяты Фестываль кулікоў, закліканы звярнуць увагу на Тураўскі луг.
Арганізатарамі фестывалю выступілі грамадская арганізацыя «Ахова птушак Бацькаўшчыны» і Тураўскі гарадскі выканаўчы камітэт.
Адкрыццё фестывалю адбудзецца ў 11 гадзін, з 11.30 да 13.30 арганізатары запрашаюць на свята «Гаспадар Тураўскага луга», дзе пройдзе конкурс прывітанняў школьных каманд «Кулiчынае прывiтанне», дэфіле «Кулiчыная мода» і канцэрт «Песні Тураўскага балоння» з удзелам гурту Vuraj.
«Упершыню ў рамках фестывалю пройдзе мастацкі пленэр «Фарбы Тураўскага луга». У ім возьмуць удзел вучні Мінскай дзяржаўнай гімназіі-каледжа мастацтваў і школы мастацтваў з Турава. Дзеці будуць маляваць унікальныя пейзажы Тураўшчыны», — сказала каардынатар фестывалю Лідзія Пшаніцына.
Акрамя таго, у рамках фестывалю пройдуць спартыўныя конкурсы, інтэлектуальныя віктарыны і майстар-класы.
Тураўскі луг з`яўляецца адным з найбольш важных месцаў для гнездавання і прыпынку падчас міграцый больш як 50 відаў водна-балотных птушак. Яму прысвоены міжнародны статус «тэрыторыі, важнай для птушак», а таксама статус біялагічнага заказніка.
На Тураўскім лузе знаходзіцца найбуйнейшае ў Беларусі стабільнае паселішча занесенага ў Чырвоную кнігу аднаго з відаў куліка — марадункі, у гонар якога ў 2009 годзе ў горадзе быў устаноўлены адзіны ў свеце помнік. У сакавіку 2014 года арнітолагі ўстанавілі на Тураўскім лузе абсалютны рэкорд улічаных птушак: 200 тысяч асобін на 1 квадратным кіламетры.
Цяпер чытаюць
У дзень пачатку Пецярбургскага эканамічнага форуму УСУ нанеслі дзясятак удараў па нафтавым тэрмінале ў порце горада і базе Балтфлота ў Кранштаце33
Каментары