Пад Мінскам прадаюць дом з уласнай прыстанню. Ёсць і вінны склеп. Пра цану можна паспрачацца
Сядзіба з уласным выхадам да вады збудаваная ў адной з самых дарагіх і маляўнічых вёсак пад Мінскам.
Вёска Дуброва ў Смалявіцкім раёне яшчэ некалькі дзесяцігоддзяў таму была звычайным населеным пунктам. Але ў 1980‑я ўсё змянілася: на рэках Усяжа і Дуброўка з’явілася Дуброўскае вадасховішча, і месца хутка ператварылі ў адзін з папулярных дачных кірункаў пад Мінскам. Ад МКАД — 25 кіламетраў.
За амаль паўстагоддзя вёска істотна разраслася. Калі раней тут была толькі Цэнтральная вуліца, то цяпер — ужо некалькі: Лясная, Падгорная, завулак Набярэжны. Паводле звестак на пачатак 2023 года, у Дуброве жылі 99 чалавек.
Сёння гэтае месца асабліва любяць мінчукі. Участкі тут лічацца аднымі з самых дарагіх у прыгарадзе, а дамы з відам на ваду доўга на рынку не затрымліваюцца.
Цяпер у Дуброве на продаж выставілі тое, што ў абвестцы Realt.by называюць «рэзідэнцыяй прэміяльнага ўзроўню». Кошт — каля 1,2 мільёна даляраў.
Галоўная «фішка» — уласны выхад да вады і прыватная прыстань на беразе Дуброўскага вадасховішча. З тэрас і панарамных вокнаў адкрываецца від на лес і ваду, а ўся тэрыторыя больш нагадвае невялікі загарадны курорт.
Плошча ўчастка — 30,6 соткі. На тэрыторыі зрабілі ландшафтны дызайн, спартыўную пляцоўку, зону барбекю, праклалі сетку дарожак і арганізавалі адкрытую паркоўку з зарадкай для электрамабіля.
Прадугледжаныя аўтаматычныя вароты, відэаназіранне і ахоўная сігналізацыя.
Асноўны дом — двухпавярховы, з трохметровымі столямі, цёплай падлогай, сістэмай вентыляцыі і кандыцыянавання. Ацяпленне газавае, з магчымасцю дыстанцыйнага кіравання. Ваду падаюць са свідравіны.
На першым паверсе размясцілі вялікую гасцёўню, кухню-сталовую, дзве спальні, санвузел з хамамам, а таксама гараж, кацельню і кладоўку.
На другім паверсе размясціліся дзве спальні, гардэробныя і панарамная тэраса з лежакамі і душавой зонай.
Асобна на пляцы знаходзяцца лазня з купеллю, дом адпачынку з більярдам і PlayStation, вінны дом з вінным склепам, яшчэ адзін асобны склеп і гараж для аўтамабіляў і воднай тэхнікі.
У абвестцы падкрэсліваюць, што праект ствараўся некалькі гадоў і запатрабаваў складаных маналітных і ландшафтных работ. Аўтары сцвярджаюць, што дом прызначаны «для тых, хто цэніць прыватнасць, інжынерную прадуманасць і рэдкія відавыя характарыстыкі каля вады».
Праўда, нават для Дубровы кошт выглядае асаблівым. Для параўнання: на той жа вуліцы цяпер прадаецца катэдж з басейнам плошчай 165 квадратных метраў на ўчастку 11,4 соткі — за 260 тысяч даляраў. Але той — без сваёй прыстані, панарамных відаў і астатніх атрыбутаў «прыватнага курорта».
Цяпер чытаюць
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч1919
Каментары