Былая супрацоўніца пратакола Лукашэнкі Дар'я Шманай стала кіраўніцай таямнічай беларускай арганізацыі ў Маскве
Расійскую «дачку» загадкавага беларускага «Фонду першага» ўзначаліла Дар’я Шманай, заўважыла «Люстэрка». Раней яна была дарадцай-пасланніцай беларускага пасольства ў Расіі, а да гэтага ўваходзіла ў службу пратакола Аляксандра Лукашэнкі. За год гэтая структура прыцягнула «ахвяраванняў» больш як на 44 млн рублёў.
У створанага па ініцыятыве Аляксандра Лукашэнкі «Фонду першага» ёсць даччыная арганізацыя ў Расіі пад назвай «Крыніца». Як даведалася «Люстэрка» з дадзеных рэсурсу audit-it.ru, з 8 мая гэтага года яе дырэктарам прызначана Шманай Дар’я Міхайлаўна.
Жанчына да 2014 года працавала ў Нацыянальнай школе прыгажосці, пазней стала начальніцай спецаддзела Адміністрацыі Лукашэнкі. У 2022 годзе яе прызначылі дарадцай-пасланніцай беларускага пасольства ў Маскве.
Раней кіраўніком «Крыніцы» быў Мікалай Леанідавіч Латышонак. Гэта поўны цёзка вайскоўца і былога кіраўніка ўпраўлення асабістай аховы Лукашэнкі, а цяпер — памочніка палітыка. Ён верна служыць Лукашэнку з 1995 года. Латышонак запомніўся ў тым ліку тым, што 30 жніўня 2020 года, калі быў чарговы нядзельны марш, выходзіў з Палаца незалежнасці да людзей, калі амаль усе сышлі.
У адрозненне ад сваёй беларускай «мамы», расійскі фонд, які ўзначальвае Шманай, даў справаздачу аб сваім фінансавым стане за 2025 год.
Судзячы з дакументаў, у яго паступіла «добраахвотных маёмасных унёскаў і ахвяраванняў» на 1,14 млрд расійскіх рублёў (каля 15 млн даляраў).
З іх на ўтрыманне арганізацыі патрацілі каля 85 тысяч беларускіх рублёў. Арганізацыя зарэгістраваная ў Маскве па тым жа адрасе, па якім знаходзіцца пасольства Беларусі (вуліца Марасейка, 17/6).
Што вядома пра арганізацыю
У кастрычніку 2022 года па ініцыятыве Аляксандра Лукашэнкі быў заснаваны «Фонд першага».
Па словах палітыка, ён павінен быў замяніць закрытыя з-за рэпрэсій дабрачынныя арганізацыі. «Мы зможам акумуляваць грошы тых, хто неабыякавы. І з майго боку — гарантыя таго, што гэтыя грошы раскрадзены не будуць», — гаварыў ён у кастрычніку 2023‑га — праз год пасля стварэння фонду. А беларусам абяцалі поўную празрыстасць працы структуры — маўляў, «кожны ахвочы можа паглядзець, куды накіраваны яго грошы».
Аднак структура альбо наогул не вядзе ніякай дзейнасці, альбо яе старанна хавае.
Цяпер чытаюць
Дэпутатка, якая рыхтуе прыгажунь для Лукашэнкі, выйшла замуж23
Каментары
Чаканне - АІ
Рэчаіснасць - shmanAI