Расія ў ходзе маштабных сакавіцкіх вучэнняў на паўночным захадзе краіны адпрацавала захоп раёнаў Даніі, Нарвегіі, Швецыі і Фінляндыі, сцвярджае эксперт Цэнтра еўрапейскага палітычнага аналізу (Center for European Policy Analysis, CEPA) Эдвард Лукас ў сваім дакладзе »Шторм ідзе».
Лукас, вядомы ў тым ліку як аўтар кнігі «Новая халодная вайна: Як Крэмль пагражае Расіі і Захаду», сцвярджае ў сваім дакладзе, што расійскія войскі адпрацоўвалі задачы па кантролі над канкрэтнымі рэгіёнамі: прыналежнымі Фінляндыі Аландскімі астравамі, шведскім востравам Готланд, дацкім Борнхальмам, а таксама поўначчу Нарвегіі.
У афіцыйных паведамленнях для СМІ Мінабароны не давала указанняў наконт таго, супраць якога «ўмоўнага праціўніка» ваююць злучэнні. У ходзе Стратэгічнай камандна-штабной трэніроўкі была задзейнічана авіяцыя і флот, падраздзяленні Іванаўскага злучэння Паветрана-дэсантных войскаў былі перакінутыя ў Запаляр'е, а пскоўскія дэсантнікі уступалі ў бой з праціўнікам на незнаёмай пляцоўцы пасля дэсантавання. «Падраздзяленні спецыяльнай разведкі, якія ажыццявілі высадку парашутным спосабам з захопам плацдарма для развіцця наступлення асноўных сіл, здзейснілі марш у тыл блакіраваных падраздзяленняў умоўнага праціўніка. Падчас правядзення адначасовай перагрупоўкі войскаў з учыненнем маршаў і перадыслакацыяй падраздзяленняў ВДВ удзельнічала звыш 2000 дэсантнікаў Пскоўскага злучэння ВДВ, больш за 120 адзінак баявой тэхнікі, да 10 самалётаў Ваенна-транспартнай авіяцыі», — апісваў гэты манеўр сайт Мінабароны.
Паводле дадзеных Лукаса, усяго ў вучэннях удзельнічалі каля 33000 ваеннаслужачых. Гэтак маштабная раптоўная праверка выклікала непакой ў кіраўніцтве НАТА. Генеральны сакратар альянсу Енс Столтэнберг назваў манеўры пагрозай сусветнай стабільнасці і паскардзіўся, што яны праводзяцца «без папярэджання».
Лукас паказвае, што рэалізацыя такога сцэнару здольная за лічаныя гадзіны разбурыць рэнамэ НАТА як самага паспяховага ваеннага саюза ў гісторыі, а таксама скінуць ЗША з пастамента гаранта стабільнасці ў Еўропе.
Дацкае англамоўнае выданне Local таксама са спасылкай на даклад Лукаса паведамляе, што ў чэрвені 2014 расійскія самалёты прадэманстравалі атаку на Борнхальм ў момант, калі там праходзіў штогадовы палітычны фестываль Folkemødet.
Эксперт таксама звяртае ўвагу на раз'яднанасць краін поўначы Еўропы, якія не выступаюць адзіным блокам: хтосьці з'яўляецца сябрам НАТА, хтосьці — не, некаторыя краіны рэгіёну ўваходзяць у Еўрасаюз, а іншыя аддаюць перавагу аўтаноміі. Ён заклікае актывізаваць узаемадзеянне ў сферы бяспекі.
Адзначым, што 20 сакавіка расейскі пасол у Даніі Міхаіл Ванін вельмі рэзка пракаментаваў магчымае далучэнне Капенгагена да сістэмы супрацьракетнай абароны (ПРА) НАТА. Ён заявіў, што гэта будзе ўспрынята Масквой як пагроза, а «дацкія ваенныя караблі стануць мішэнню для расійскіх ядзерных ракет».
Пасля шуміхі, што паднялася ў СМІ, намеснік міністра абароны Расіі Анатоль Антонаў заявіў, што Масква ваяваць не хоча і пагрозы нікому не ўяўляе. Ён заклікаў не рабіць з Расіі «монстра, які пагражае сусветнай бяспецы».
Каментары