Пад іх танчыў Юрый Шаўчук, а Пітэр Гэбрыэл запрашаў на свае фестывалі: «Троіца» святкуе 20-годдзе вялікім канцэртам
2 снежня, Палац культуры прафсаюзаў (пр-т Незалежнасці, 25). Пачатак а 19.00.
Іван Кірчук, Юрый Паўлоўскі і Юрый Дзмітрыеў запрашаюць у чарговае магічнае падарожжа па беларускай спрадвечнай музыцы, якое немагчыма прапусціць!
2 снежня ў мінскім Палацы прафсаюзаў упершыню разам з «Троіцай» сыграюць і знакавыя беларускія музыкі, імёны якіх будуць раскрытыя пазней.
Адзін з самых вядомых беларускіх гуртоў у свеце за дваццаць гадоў існавання сыграў на сотні вялікіх фестываляў ад Малайзіі да Чылі. На рахунку «Тройцы» і выступы на культавым Sziget Festival, і ўдзел у найбуйнейшым этна-фестывалі Womad, які ладзіць экс-удзельнік брытанскага гурту Genesis і прадзюсар этна-выканаўцаў Пітэр Гэбрыэл.
Насамрэч гісторыя «Тройцы» налічвае больш за 20 гадоў. Збіраць і апрацоўваць фальклор Іван Кірчук пачаў яшчэ на пачатку 1980-х. Тады ж з выпускнікоў тагачаснай Мінскай культпрасветвучэльні (цяпер Мінскі дзяржаўны каледж мастацтваў) быў створаны ансамбль «Дзіва».
А ў сярэдзіне 1990-х музыкі Віталь Шкілёнак і Дзмітрый Лук’янчык прапанавалі Кірчуку запісаць сумесна народную песню, якая б добра лягла пад гітарны рыф. І пачалося…
«У мяне акурат была палеская песня «Трава мая, травушка». Я і кажу: «Давайце паспрабуем!», — прыгадвае Іван Кірчук першыя крокі «Тройцы».
— Песня вельмі ўдала лягла, і яны прапанавалі збірацца. І тут нас пачалі клікаць амбасады: амерыканская, індыйская… Пасля нас запрасіў Юрый Шаўчук сыграць на разагрэве DDT у Мінску і выступіць на піцерскім рок-фэсце, дзе ён танчыў пад «Яблынь мая». Далей Стас Намін паклікаў у Маскву… За тры гады мы даволі добра пашумелі».
Пасля з'яўлення першага альбома пад назвай «Троіца», які выйшаў у Галандыі, склад гурту змяніўся. На змену Лук'янчыку і Шкілёнку ў 1999-м прыйшлі два Юрыі — Паўлоўскі і Дзмітрыеў.
Мала, хто ведае, што тады трыа нават змяніла назву на «Этна», але пад націскам прыхільнікаў перайменавалася ў «Этна-трыа Троіца». З таго часу сённяшні калектыў і адлічвае сваю гісторыю. Таму менавіта сёлета гурт адзначае 20-годдзе.
Падчас юбілейнага канцэрта музыкі, а на рахунку «Тройцы» 7 альбомаў, абяцаюць самае лепшае і неспадзяваных гасцей, з якімі сыграюць вядомыя хіты.
Квіткі ўжо ў продажы ва ўсіх касах і на сайтах білетных аператараў. Цана: ад 28 рублёў.
Цяпер чытаюць
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм1717
Каментары