Сёння Мінскі гарадскі суд зноў вярнуўся да крымінальнай справы вучонага, акадэміка, лаўрэата Дзяржпрэміі, вядомага доктара Аляксандра Бялецкага. Яго раней прызналі вінаватым па ч. 3 арт. 430 КК (Атрыманне хабару ў асабліва буйным памеры) і прысудзілі да 7,5 года пазбаўлення волі. Зараз Аляксандр Валянцінавіч адбывае пакаранне ў ВК-3 (Віцьба), піша Tut.by.
На працэс па справе Аляксандра Бялецкага прыйшлі толькі яго родныя, асуджанага ў Мінск не дастаўлялі. Як аказалася, акадэмік звярнуўся ў суд з заявай адмяніць канфіскацыю. На ягоную маёмасць быў накладзены арышт, але ў даход дзяржавы яшчэ нічога не забіралася.
«У сувязі з уступленнем у сілу закона РБ ад 19 ліпеня 2019 года прашу спыніць выкананне прысуду ў частцы канфіскацыі маёмасці і вызваліць мяне ад дадатковага пакарання», - зачытала суддзя Валянціна Зянькевіч заяву Бялецкага.
Гэтым летам былі ўнесены змены ў Крымінальны кодэкс: выключана дадатковае пакаранне ў выглядзе канфіскацыі маёмасці. Таму прысуд трэба прывесці ў адпаведнасць з новым законам. Заяву Аляксандра Бялецкага падтрымала яго адвакат Марыя Севярын, пракурор Аляксандр Кароль не стаў пярэчыць супраць адмены канфіскацыі маёмасці. Суд пайшоў у дарадчы пакой, пасля абвясціў рашэнне: вызваліць асуджанага Бялецкага ад канфіскацыі.
- У сувязі з выключэннем арт. 61 з КК асобы, асуджаныя да дадатковага пакарання ў выглядзе канфіскацыі маёмасці, падлягаюць вызваленню ад гэтага віду пакарання, калі яно не выканана. (…) З улікам устаноўленых па справе акалічнасцяў Бялецкі падлягае вызваленню ад прызначанага дадатковага пакарання ў выглядзе канфіскацыі маёмасці, - зачытала рашэнне суддзя Валянціна Зянькевіч. - Варта адмяніць арышт, накладзены на маёмасць асуджанага.
У рашэнні пералічана ўсё, што вернуць урачу: дзве памятныя манеты чэмпіянату свету па хакеі 2014 года; памятную манету Свяціцеля Мікалая Цудатворца; драўляную скрынку са сподкам, падшклянкі і лыжкі; больш за 125 тысяч даляраў на рахунках у банках; аўто BMW X3; гараж і кватэру ў Мінску; будынак у Ратамцы; парковачнае месца; 65 тысяч еўра; 354 600 даляраў; аблігацыі на 15 тысяч даляраў; iPhone.
Нагадаем, у лютым 2019 года Мінскі гарадскі суд прызнаў навукоўца, акадэміка, лаўрэата Дзяржпрэміі, вядомага доктара Аляксандра Бялецкага вінаватым у атрыманні хабараў. Сам фігурант ня адмаўляў: ён сапраўды атрымаў 4 тысячы еўра і 3 тысячы даляраў, але ўспрымаў іх як падарунак, а не хабар. Частку грошай Бялецкі патраціў на кангрэс у Барселоне, дзе ў склад беларускай дэлегацыі ўваходзіла 12 чалавек.
Каментары