Зірніце, як цяпер будзе выглядаць галерэя, з якой канфіскавалі карціны Белгазпрамбанка
«Галерэя «Арт-Беларусь» зноў адчыніць свае дзверы з заўтрашняга дня. На жаль, без карцін з карпаратыўнай калекцыі Белгазпрамбанка, — паведамляецца на старонцы галерэі ў фэйсбуку. — Працы можна будзе паглядзець на вялікім праектары, а біяграфіі аўтараў і гісторыі палотнаў — з дапамогай QR-кодаў у пустых рамах на чыстых сценах галерэі», — пішуць куратары галерэі.
Пачынаючы з аўторка, 16 чэрвеня, уваход у галерэю «Арт-Беларусь» свабодны.
Карціны з калекцыі Белгазпрамбанка былі канфіскаваныя разам з іншымі каштоўнасцямі падчас вобшуку ў банку 11 чэрвеня.
Ні пра якія прэтэнзіі да Белгазпромбанка, менеджарам якога доўгі час быў Віктар Бабарыка, і кампаній сяброў Бабарыкі не было вядома, пакуль гэты банкір і мецэнат не заявіў пра свае прэзідэнцкія амбіцыі. Ён сышоў у адстаўку з банка ў дзень, калі заявіў пра свой намер балатавацца.
Сам Бабарыка назваў дзеянні сілавікоў і заявы Лукашэнкі ціскам на сябе.
«Уся мая дзейнасць, якая праходзіла на пасадзе кіраўніка Белгазпрамбанка цягам 20 гадоў, не выклікала заўваг з боку праваахоўных органаў, — сказаў ён 11 чэрвеня. — Мы праходзілі ўсе праверкі, у тым ліку Нацбанка. Апошняя — у студзені. Ні разу пытанняў не было. Дзеянні сённяшняга дня носяць замоўны характар», — сказаў ён.
Ён заклікаў праваахоўныя органы трымацца законнасці.
«Я чакаў ціску на мяне, і была інфармацыя, што ўдар будзе па мне. Але тое, што адбылося, паказвае, што супраць мяне нічога няма. Я гатовы да гэтага», — кажа Бабарыка.
«Увесь цынізм такіх дзеянняў у тым, што яны накіраваныя не на мяне, а накіраваныя на маіх сяброў і людзей, з якімі я працаваў, — адзначыў прэтэндэнт на пасаду прэзідэнта ў сваім звароце. — Чаму гэта зроблена? Бо прамога кампрамату на мяне няма і ў іх ёсць вялікая надзея, што людзей запалохаюць, прымусяць казаць няпраўду і агаворваць другіх людзей.
Я магу з дакладнасцю заявіць, што адзінымі правільнымі паводзінамі і адказам у гэтай сітуацыі, адказам на гэтае бязмежжа з'яўляецца працяг нашай барацьбы.
Я хачу звярнуцца да ўсіх тых, хто ўжо падвергся допытам, пераследам і выклікам ва ўпаўнаважаныя органы.
Не бойцеся казаць праўду. Не кажыце хлусню, не агаворвайце сябе і іншых людзей. Калі трэба, я спадзяюся, што «Сумленныя людзі» заўсёды акажуць вам дапамогу — як юрыдычную, так і матэрыяльную», — заявіў Бабарыка.
Атакі на Бабарыку абвастрылі танальнасць яго выступаў.
«Самая вялікая памылка ў гэтых дзеяннях улады ў тым, што той Беларусі, якая была раней і якую яны папіхалі як свой статак, больш не існуе. Беларусь прачнулася. І я хачу сказаць, што новая Беларусь змяце рэшткі гэтага старога рэжыму», — сказаў ён у відэазвароце.
Пераслед калег Віктара Бабарыкі пачаўся, калі стала вядома, што яго ініцыятыўная група сабрала рэкордную для альтэрнатыўнага кандыдата колькасць подпісаў — 335 001 па стане на сёння.
Раней максімум — 217 тысяч — сабраў у 1994-м, яшчэ на свабодных выбарах, Зянон Пазняк. У Аляксандра Мілінкевіча ў 2006-м было 198 тысяч. У Сямёна Домаша ў 2001-м — 164 тысячы.
Чытайце: Колькі подпісаў збіралі дэмакратычныя кандыдаты на прэзідэнцкіх выбарах? Лідар — Пазняк ТАБЛІЦА
Таксама і шэраг апытанняў паказаў, што менавіта Віктар Бабарыка мог бы стаць фаварытам сумленных выбараў.
Бабарыка спрабуе выбудаваць шырокую антылукашэнкаўскую кааліцыю з удзелам самых розных сілаў. Яго кандыдатуру падтрымала таксама нобелеўская лаўрэатка Святлана Алексіевіч.
Чытайце таксама: Бабарыка запісаў відэазвароты на выпадак свайго затрымання
Белгазпрамбанк падчас кіравання ім Віктара Бабарыкі скупляў карціны ўраджэнцаў Беларусі ва ўсім свеце і прывозіў у Беларусь, абвінавачванне ў намеры вывезці іх з Беларусі Бабарыка назваў абсурдным.
Каментары