Кіраўнік КДБ Іван Церцель у вечаровым эфіры тэлеканала «Беларусь-1» гаварыў аб планах апазіцыі на Дзень Волі.
Па словах Церцеля, апазіцыя распрацавала некалькі варыянтаў развіцця падзей, у іх уключаныя людзі, якія раней пакінулі Беларусь. Крайнімі нібыта вырашана зрабіць вядомых сярод беларускай апазіцыі асобаў: кіраўніка БНФ Рыгора Кастусёва і лідара Руху «За Свабоду» Юрася Губарэвіча, а таксама каардынатараў дваравых чатаў.
Адметна, што заяўнікі, не парушаючы закону, не агучвалі планы маршруту. Затое планамі апазіцыі падзяліўся сам Церцель. Па ягоных словах, першы сцэнар — гэта збор людзей на плошчы Якуба Коласа, шэсце да Опернага тэатра. Другі — збор на Бангалоры і шэсце да цэнтру. Трэці, у выпадку афіцыйнай адмовы, нібыта прадугледжвае несанкцыянаваны выхад людзей на вуліцы.
І Рыгор Кастусёў, і Юрась Губарэвіч адмовіліся каментаваць маршруты, яны лічаць, што гэта можа даць падставу для Мінгарвынкама адмовіць у афіцыйным правядзенні Дня Волі.
«Я бачу, што ў КДБ пільна цікавяцца любым крокам апазіцыі. Заяўка ў Мінгарвыканкам была пададзена 9 сакавіка каля 16:00, а ўжо вечарам Церцель агучваў нібыта нашы планы.
Словам Церцеля зусім не здзіўлюся, мы помнім былых кіраўнікоў КДБ, якія расказвалі, што апазіцыя хоча атруціць ваду ў Мінску дохлымі пацукамі — гэта заява вельмі падобная.
Мы імкнёмся не парушаць дзейнае беларускае заканадаўства, і заяўка была пададзена цалкам у межах гэтага заканадаўства. Калі яго хто парушае, то з іншага боку — калі на наш зварот нічога не адказвае міліцыя, парушаючы закон аб зваротах», — кажа Рыгор Кастусёў.
10 сакавіка ў прыёмную Церцеля тэлефанаваў старшыня БСДП Ігар Барысаў, ён хацеў сустрэцца з кіраўніком КДБ, каб абмеркаваць магчымыя правакацыі, якія могуць рыхтавацца, аднак Церцель адмовіўся ад такой сустрэчы.
«Рашэнне падаць заяўку і распрацоўка маршруту прымалася выключна заяўнікамі, без усялякіх умяшальніцтваў звонку. Мы кіраваліся пытаннем зручнасці для людзей. Калі КДБ мае інфармацыю, што знешнія сілы рыхтуюць правакацыю, то мы б хацелі мець такія звесткі, бо самі мы ніякіх правакацый не рыхтуем», — кажа Юрась Губарэвіч.
Цяпер чытаюць
Гэты беларус даследуе рак — вось што ён кажа пра SPF ад меланомы, навуковы прагрэс і самы складаны ў лячэнні рак3
Каментары