Kiraŭnik KDB Ivan Cierciel u viečarovym efiry telekanała «Biełaruś-1» havaryŭ ab płanach apazicyi na Dzień Voli.
Pa słovach Cierciela, apazicyja raspracavała niekalki varyjantaŭ raźvićcia padziej, u ich uklučanyja ludzi, jakija raniej pakinuli Biełaruś. Krajnimi nibyta vyrašana zrabić viadomych siarod biełaruskaj apazicyi asobaŭ: kiraŭnika BNF Ryhora Kastusiova i lidara Ruchu «Za Svabodu» Jurasia Hubareviča, a taksama kaardynataraŭ dvaravych čataŭ.
Admietna, što zajaŭniki, nie parušajučy zakonu, nie ahučvali płany maršrutu. Zatoje płanami apazicyi padzialiŭsia sam Cierciel. Pa jahonych słovach, pieršy scenar — heta zbor ludziej na płoščy Jakuba Kołasa, šeście da Opiernaha teatra. Druhi — zbor na Banhałory i šeście da centru. Treci, u vypadku aficyjnaj admovy, nibyta praduhledžvaje niesankcyjanavany vychad ludziej na vulicy.
I Ryhor Kastusioŭ, i Juraś Hubarevič admovilisia kamientavać maršruty, jany ličać, što heta moža dać padstavu dla Minharvynkama admović u aficyjnym praviadzieńni Dnia Voli.
«Ja baču, što ŭ KDB pilna cikaviacca lubym krokam apazicyi. Zajaŭka ŭ Minharvykankam była padadziena 9 sakavika kala 16:00, a ŭžo viečaram Cierciel ahučvaŭ nibyta našy płany.
Słovam Cierciela zusim nie ździŭlusia, my pomnim byłych kiraŭnikoŭ KDB, jakija raskazvali, što apazicyja choča atrucić vadu ŭ Minsku dochłymi pacukami — heta zajava vielmi padobnaja.
My imkniomsia nie parušać dziejnaje biełaruskaje zakanadaŭstva, i zajaŭka była padadziena całkam u miežach hetaha zakanadaŭstva. Kali jaho chto parušaje, to ź inšaha boku — kali na naš zvarot ničoha nie adkazvaje milicyja, parušajučy zakon ab zvarotach», — kaža Ryhor Kastusioŭ.
10 sakavika ŭ pryjomnuju Cierciela telefanavaŭ staršynia BSDP Ihar Barysaŭ, jon chacieŭ sustrecca z kiraŭnikom KDB, kab abmierkavać mahčymyja pravakacyi, jakija mohuć rychtavacca, adnak Cierciel admoviŭsia ad takoj sustrečy.
«Rašeńnie padać zajaŭku i raspracoŭka maršrutu prymałasia vyklučna zajaŭnikami, biez usialakich umiašalnictvaŭ zvonku. My kiravalisia pytańniem zručnaści dla ludziej. Kali KDB maje infarmacyju, što źniešnija siły rychtujuć pravakacyju, to my b chacieli mieć takija źviestki, bo sami my nijakich pravakacyj nie rychtujem», — kaža Juraś Hubarevič.
Kolki sioleta tracili na viasielli ŭ Biełarusi? Sabrali realnyja ličby tych, chto pabyvaŭ u ZAHSie6
Kamientary