Крыніцы: судзяць падпалкоўніка ваеннай разведкі, ён мог быць звязаны са злівамі размоваў высокапастаўленых чыноўнікаў
Як стала вядома «Нашай Ніве», у Мінскім гарадскім судзе ў закрытым рэжыме пачалі разглядаць справу ў дачыненні да падпалкоўніка галоўнага разведвальнага ўпраўлення міністэрства абароны Дзмітрыя Самсонава. Яго вінавацяць адразу па трох артыкулах Крымінальнага кодэкса. Самсонава затрымалі яшчэ ў 2020-м.
Гэта ч. 1 арт. 356 «Дзяржаўная здрада», ч. 1 арт. 375 «Мэтанакіраванае разгалошванне службовай таямніцы» і ч. 2 арт. 235 «Адмыванне» сродкаў, атрыманых злачынным шляхам». Максімальны тэрмін пакарання па артыкуле «Дзяржаўная здрада» — 15 год пазбаўлення волі.
Самсонаў, як вядома «Нашай Ніве», да восені 2020-га быў супрацоўнікам Галоўнага ўпраўлення ваеннай разведкі Мінабароны ў званні падпалкоўніка. Ён служыў у сакрэтнай частцы 15738. Гэтае ўпраўленне, апроч іншага, мае доступ да матэрыялаў, атрыманых КДБ, у тым ліку праслуховак.
Крыніцы «Нашай Нівы» лічаць, што Самсонаў мог быць датычны да гучных зліваў перамоваў Эйсмант, Шакуты і Баскава восенню 2020-га.
Родныя Самсонава не пацвярджаюць, але і не абвяргаюць гэтую тэорыю.
«Затрымалі яго ўжо як год. Ці звязана гэта з палітычнымі падзеямі? Магчыма, магчыма, я магу ўявіць, але дакладна нічога не магу вам сказаць, мне нічога не кажуць, усё сакрэтна», — менавіта так адказала «Нашай Ніве» яго жонка на пытанне аб мужы.
Нагадаем, пасля справы са злівамі размоваў Эйсмант, Баскава і Шакуты, затрымалі падпалкоўніка КДБ Аляксандра Храловіча.
Па версіі беларускіх уладаў, Храловіч атрымаў злівы нібыта спецыяльна інсцэніраванных перамоваў паміж Эйсмант і астатнімі. Пра гэта быў таксама зняты фільм на АНТ «Манкурты».
Каментары