Прэзідэнт Латвіі Эдгарс Рынкевічс даручыў прадстаўніку апазіцыі Андрысу Кулбергсу паспрабаваць сфармаваць новы ўрад.
Цяпер Андрыс Кулбергс павінен правесці перамовы з партыямі і прапанаваць склад урада, які пасля яшчэ мусіць зацвердзіць парламент краіны. Прэзідэнт Латвіі лічыць, што хуткае фарміраванне новага ўрада краіны лепш, чым сітуацыя, калі цяперашні кабінет працягваў бы працаваць у статусе выканаўцы абавязкаў да новых выбараў.
Асобна падкрэсліваецца, што працэс трэба правесці ў сціслыя тэрміны, бо да парламенцкіх выбараў засталося няшмат часу. Кулбергс павінен ужо да 25 мая прадставіць справаздачу аб ходзе перамоў, магчымым складзе кааліцыі і асноўных напрамках працы ўрада.
Партыя «Аб’яднаны спіс», якую ён прадстаўляе, зараз з’яўляецца найбуйнейшай апазіцыйнай сілай у парламенце, што і паўплывала на рашэнне прэзідэнта.
Сам Кулбергс прыйшоў у палітыку адносна нядаўна — у 2022 годзе, да гэтага ён быў вядомы як бізнэсмен і эксперт у аўтамабільнай сферы. У парламенце ён актыўна ўдзельнічае ў дыскусіях і займаўся расследаваннем праблем, звязаных з буйнымі інфраструктурнымі праектамі.
Папярэдні ўрад на чале з Эвікай Сіліня падаў у адстаўку пасля распаду кааліцыі. Гэта адбылося на фоне палітычных спрэчак, у тым ліку вакол сітуацыі з адстаўкай міністра абароны, што ў выніку прывяло да крызісу ўлады.
Новы ўрад павінен працаваць да чарговых парламенцкіх выбараў, якія запланаваныя на восень 2026 года.
Цяпер чытаюць
Пастар Грэм на «Чыжоўка-арэне» папрасіў маліцца за Лукашэнку і Пуціна. А сам маліўся за Трампа55
Каментары