На «дыялогавых пляцоўках» людзей пужаюць фэйкавым «планам Далеса»
Фэйкавы «план Далеса» цытаваў на сустрэчы з жыхарамі гарадскога пасёлка Касцюкоўка на Гомельшчыне дэпутат Палаты прадстаўнікоў Віталь Уткін.
Дэпутат цытуе тэкст, які лёгка можна знайсці ў любым расійскім канспіралагічным ксенафобскім выданні:
«Наступствам халоднай вайны супраць Савецкага Саюза стала сучасная гібрыдная вайна. Яна бярэ свае вытокі ў 1945 годзе, калі дырэктар ЦРУ Ален Далес склаў план па знішчэнні СССР. Там, у прыватнасці, ёсць наступныя словы: «Мы кінем усё, што маем, усё золата, усю матэрыяльную моц на абалваньванне і адурманьванне савецкіх людзей. Чалавечая свядомасць здольная змяняцца. Пасеяўшы там хаос, мы непрыкметна падменім іх каштоўнасці на фальшывыя і прымусім іх у гэтыя фальшывыя каштоўнасці верыць… У кіраванні дзяржавай створым хаос і бязладдзе… Галоўную стаўку зробім на моладзь».
«Мы з вамі бачым, які рэсурс быў кінуты ў 2020 годзе на нашу моладзь», — зрабіў з гэтага выснову дэпутат, які, як сцвярджаецца, «паставіўся да сустрэчы з усёй сур'ёзнасцю».
«План Далеса» — гэта фальшыўка, якая часта тыражуецца расійскімі шавіністычнымі СМІ, міфічны план дзеянняў ЗША супраць СССР. У выглядзе, які цытуецца, ён нідзе не публікаваўся, а англійскі арыгінал яго, здаецца, ніколі не існаваў. Яго прыдумалі ў 1990-я.
Цытаваць «план Далеса» як нібыта сапраўдны дакумент — тое самае, што прымаць за чыстую манету «Пратаколы сіёнскіх мудрацоў», створаныя ў пачатку ХХ стагоддзя ў Расійскай імперыі для апраўдання антысеміцкай палітыкі. Але беларускія чыноўнікі нічога кепскага ў гэтым не бачаць. У снежні 2020 года відэа пра «план Далеса» на сустрэчы са студэнтамі БДУ ставіла старшыня Савета Рэспублікі Наталля Качанава.
А пасля гэтыя самыя людзі гавораць пра гістарычную памяць і патрэбу яе захавання, пагражаючы нязгодным нават крымінальнай адказнасцю. Нібыта сапраўдная гістарычная памяць можа грунтавацца на фэйках.
Віталь Уткін — дэпутат Палаты прадстаўнікоў ад Гомеля. Выпускнік Украінскай акадэміі ўнутраных спраў. Служыў у міліцыі, з 1993 да 2019 працаваў чыноўнікам у Гомелі.
Ён не першы раз адзначаецца адыёзнымі выказваннямі, супярэчнымі здароваму сэнсу. Так, год таму ён ацаніў перанос чэмпіяната свету па хакеі з Беларусі як помсту за перамогу ў «Вялікай Айчыннай вайне», а ў чэрвені 2021-га паставіў беларускіх удзельнікаў пратэстнага руху на адну дошку з арганізацыяй «Аль-Каіда», а Святлану Ціханоўскую — з Усамай Бен-Ладэнам.
Чытайце таксама:
Дэпутат: Адмена ЧС па хакеі — помста нам за перамогу ў Вялікай Айчыннай вайне
Студэнты пра затрыманні журналістаў: «Хто будзе асвятляць усё, што адбываецца?» Качанава: «А навошта асвятляць?»
«Адпусціце, калі ласка, сына!» Амерыканца з амнезіяй, які нелегальна прыехаў у Беларусь, не аддаюць маці5
Каментары