10 жніўня ў Вярхоўным судзе Беларусі пачаўся разгляд скаргі заснавальнікаў праваабарончага аб’яднання «Наша Вясна» да Міністэрства юстыцыі наконт адмовы ў рэгістрацыі арганізацыі.
Судовы працэс павінен быў пачацца 27 ліпеня, аднак яго ўдзельнікі з боку істца не змаглі ў гэты дзень з’явіцца на пасяджэнне і папрасілі суд перанесці дату слуханняў. Суд гэтае хадайніцтва задаволіў.
Як паведамлялася раней, устаноўчы з’езд грамадскага праваабарончага аб’яднання «Наша Вясна» прайшоў 29 сакавіка. 25 мая Міністэрства юстыцыі адмовіла ў рэгістрацыі арганізацыі. Як гаворыцца ў лісце Мінюста, «многія з заснавальнікаў ГПА «Наша Вясна» прыцягваліся да адміністрацыйнай адказнасці, многія з іх неаднаразова, у тым ліку за правапарушэнні, звязаныя з парушэннем грамадскага парадку, а таксама правоў і свабод іншых асоб». Акрамя таго, «ёсць прыклады распачынання крымінальных спраў у дачыненні да пэўных заснавальнікаў ГПА».
У лісце Мінюста адзначалася, што «ў спісе заснавальнікаў ГПА названы звесткі, якія не адпавядаюць сапраўднасці або з’яўляюцца скажонымі».
Праваабаронцы лічаць, што падставы для адмовы ў рэгістрацыі не адпавядаюць закону аб грамадскіх аб’яднаннях.
Раней Міністэрства юстыцыі адмаўляла ў рэгістрацыі арганізацыі двойчы: у 2007 і 2009 гадах. Апошняя адмова ў рэгістрацыі была атрымана 26 лютага гэтага года. Праваабаронцы аспрэчвалі гэтае рашэнне ў Вярхоўным судзе. 22 красавіка суд пакінуў без задавальнення скаргу заснавальнікаў ГПА «Наша Вясна» на рашэнне Міністэрства юстыцыі.
Як раней заяўлялі заснавальнікі праваабарончай арганізацыі, калі Вярхоўны суд не абавяжа Мінюст зарэгістраваць ГПА «Наша Вясна», больш спроб рэгістрацыі рабіцца не будзе. Праваабаронцы заявілі аб гатоўнасці працягваць сваю дзейнасць без афіцыйнай рэгістрацыі.
Цяпер чытаюць
«Патрабавалі, каб я з калегамі пры дзецях па-беларуску не размаўляла». Ці сутыкаюцца беларускамоўныя з булінгам у краіне27
Каментары