«Пазваніў папрасіць лекаў ад ванітаў, падумалі — у палоне, а аказалася, што мые рускія танкі ад парэшткаў», — сваякі беларускага салдата
«Нашай Ніве» стала вядомая гісторыя беларускага салдата тэрміновай службы, які прызываўся ў адну з часцей на захадзе краіны. Нядаўна ён пазваніў бацькам з незнаёмага нумара ў Вайбер з просьбай прывезці лекаў ад ванітаў і млоснасці пад Гомель.
«Першая думка — што сын ва ўкраінскім палоне і паранены, — перадаюць нам змест размовы сваякі. — Таму адразу сказалі: давай кажы як ёсць, чаму ты не ў сваёй часці, для чаго табе лекі, дзе ты знаходзішся?
Але, аказалася, што ён у раёне Камарына, пад Гомелем, і разам з іншымі салдатамі тэрміновай службы ўдзельнічае ў аднаўленні падбітай і зламанай расійскай тэхнікі [Камарын — апошні населены пункт у Беларусі на дарозе да ўкраінскага Чарнобыля. Гэтая дарога цалкам занятая расійскімі войскамі, якія па ёй ажыццяўляюць забеспячэнне сваіх сілаў пад Кіевам. — «НН»].
А лекі ад ванітаў яму патрэбныя таму, што яны з хлопцамі адмываюць тэхніку, якая пацярпела ў баях, і, як ён выказаўся, мае на сабе фрагменты чалавечых целаў, парэшткаў, ад чаго хлопцаў ванітуе. Вось так».
Пацвердзіць дэталі гэтай гісторыі з іншых крыніц нам не ўдалося праз закрытасць беларускай ваеннай сістэмы, але ўдалося знайсці сваякоў іншых салдат, якія пацвердзілі, што чулі ад сваіх дзяцей фразы накшталт «пад Гомелем мыем танкі».
Мяркуючы па ўсім, Расія нясе ва Украіне вялікія страты ў тэхніцы і жывой сіле.
З Беларусі пры гэтым ажыццяўляецца тылавое забеспячэнне аперацыі: на беларускіх аэрадромах базуецца расійская авіяцыя, тут рамантуецца тэхніка і лечаць параненых.
Бой пад Вазнясенскам: так украінцы перамаглі ў сутыкненні, якое ўратавала Адэсу
Цяпер чытаюць
Азараў моцна пакрыўдзіўся на словы «псеўдалідаркі Ціханоўскай», што яго План Перамога быў памылкай29
Каментары