«Жыву ў свабоднай краіне»: падлетак пасадзіў на зямлю экс-кіраўніка ГУБАЗіКа. Той у адказ пачаў страляць ПАДРАБЯЗНАСЦІ
Як стала вядома «Нашай Ніве», трапіў у гісторыю сумнавядомы Андрэй Паршын, адзін з асноўных арганізатараў масавых рэпрэсій у Беларусі і да нядаўняга часу кіраўнік ГУБАЗіКа. Ён паспрабаваў разагнаць групу дзяцей і падлеткаў каля свайго пад'езда (малодшаму ў кампаніі было 11 год), але атрымаў адпор ад 16-гадовага хлопца. Вынік: хлопец у бальніцы пад кропельніцамі з прастрэленай нагой, у Паршына — страсенне мозгу.
Гэтае здарэнне адбылося 21 чэрвеня ў прэстыжным мінскім мікрараёне «Каскад». «Наша Ніва» знайшла некалькі сведкаў таго, што адбылося.
«Кампанія з пяці дзяцей сядзела на лавачцы каля пад'езда. Пара дзяўчат, хлопцы. Меншаму ў кампаніі было 11 гадоў. Усе на канікулах, проста бавілі час — было трохі раней за 19 гадзін, — расказвае «Нашай Ніве» абставіны гісторыі адзін са сведкаў. — Тут дадому вяртаўся палкоўнік Андрэй Паршын і пачаў з дзецьмі канфлікт. Маўляў, чаго сядзіцё, ваш пад'езд? Не ваш? Правальвайце. Толькі ўсё матам».
У адказ на прэтэнзіі мужчыны старэйшы з дзяцей, 16-гадовы Яўген Д., кажуць, заявіў, што «яны жывуць у свабоднай краіне, і вольныя выбіраць лавачку».
У адказ на дзёрзкі тон, сцвярджае сведка, Паршын ударыў падлетка — па твары, па шыі.
«Ухапіў за майку, разарваўшы яе адным рухам, даў хлопцу па твары. Але Яўген — кандыдат у майстры спорту па веславанні, спартовы хлопец. Ён знайшоў аргумент у адказ, у выніку чаго Паршын апынуўся на зямлі. Падняўшыся, пачаў шмаляць з пісталета па дзецях», — кажа сведка.
У выніку раненне атрымаў той самы Яўген Д. Куля трапіла ў нагу.
«Пасля гэтага Паршын занёс зброю дадому і выклікаў хуткую, а таксама міліцыю і яшчэ невядома каго. Астатніх дзяцей «апрацоўвалі» ў машыне людзі ў цывільным, пакуль медыкі хуткай ратавалі Яўгена. Казалі, што, калі будуць расказваць, як усё было, то ўсіх чакае турма. Пасля гэтага дзяцей звезлі на іншых машынах, міліцэйскіх», — кажуць сведкі.
Мы не ведаем, з якой зброі страляў Паршын, баявой ці траўматычнай, але вядома, што на дадзены момант хлопец знаходзіцца пад канвоем у вайсковым шпіталі. Ён перанёс ужо дзве аперацыі.
Супраць яго заведзена крымінальная справа па артыкуле «Хуліганства». Ноччу ў сям'ю з вобшукам прыязджалі супрацоўнікі ГУБАЗіКа. Малалетняя дзяўчына хлопца, якой 14 гадоў, імаверна, таксама правяла ноч у міліцыі. Лёс астатніх невядомы, хутчэй за ўсё, іх не затрымлівалі.
Сям'я Яўгена — шматдзетная, бацькі выхоўваюць чатырох дзяцей.
«Вельмі добрая ў яго маці. Дзеці гадуюцца ў строгасці, сумленнасці і парадку. На Яўгена — толькі станоўчая рэкамендацыя, нармальны, талковы хлопец. Спартовец, парадачны, не канфліктны. Адказны за блізкіх, бо расце ў вялікай сям'і, у вучобе не дурань», — кажа знаёмы з сітуацыяй сябра сям'і пацярпелых.
«Увесь дом у шоку. Як гэта? Чалавек служыць у міліцыі, навучаны, нібыта ведае законы. Нават калі дзеці шумелі, то што — страляць па іх? Ёсць жа нейкія патрульныя, якіх можна выклікаць, ёсць яшчэ нейкія метады вядзення дыскусіі, усе ў жаху», — кажа жыхар дома.
Па інфармацыі «Нашай Нівы», у Андрэя Паршына пасля канфлікту з дзіцём — страсенне мозгу.
Андрэй Паршын узначальваў упраўленне ўласнай бяспекі МУС, пасля чаго напачатку 2021-га быў прызначаны кіраўніком у ГУБАЗіК.
Пры ім ГУБАЗіК адыгрываў цэнтральную ролю ў правядзенні палітычных рэпрэсій: з яго ўдзелам былі вынішчаныя палітычныя структуры, незалежныя СМІ, культура, бізнэс, дзясяткі тысяч прайшлі праз затрыманні і здзекі або вымушаныя былі пакінуць радзіму.
Нядаўна Паршын быў прызначаны на генеральскую пасаду ў Дэпартамент забеспячэння аператыўна-вышуковай дзейнасці МУС.
Паршын мае кватэру ў «Каскадзе».
Канцэрт Макса Каржа пачаўся з затрымкай на дзве гадзіны. «Беларусь топ!» — крычаць і ён, і фанаты3
Каментары