Яечны жаўток — сапраўдная крыніца карысных рэчываў. У ім можна знайсці вітаміны групы В, а таксама вітаміны A, D, E і K. Менавіта адзін з іх робіць яйкі, асабліва вараныя ўкрутую, такімі карыснымі.
У складзе яек ёсць шмат карысных рэчываў. Напрыклад, лютэін і зеаксанцін спрыяюць здароўю вачэй і спаленню тлушчу, піша onet.pl.
Але адзін з элементаў яйка — жаўток — таксама вельмі добра ўплывае на здароўе мозга. Усё гэта дзякуючы наяўнасці ў жаўтку халіну, ці, інакш кажучы, вітаміну В4.
Халін з’яўляецца вельмі важным кампанентам ў сінтэзе нейратрансмітэра ацэцілхаліну — рэчыва, якое адказвае ў тым ліку і за наш настрой, памяць, працу мускулаў і іншыя функцыі нервовай сістэмы. Халін таксама дапамагае выдаляць шкодны халестэрын ЛПНП з арганізма і стымулюе перыстальтыку кішэчніка. Дастатковы ўзровень халіну ў арганізме вельмі важны для цяжарных жанчын. У асноўным гэта звязана з тым, што гэтае рэчыва ўплывае на засваенне арганізмам фоліевай кіслаты.
Такім чынам, халін — гэта важнае рэчыва, але ж людзі не заўсёды атрымліваюць яго ў дастатковай колькасці. У сваю чаргу, дэфіцыт халіну можа весці да парушэнняў у працы сэрца, печані і нервовай сістэмы, а таксама, верагодна, да накаплення ў арганізме шкоднага халестэрыну ЛПНП.
Па даных Нацыянальных інстытутаў здароўя (ЗША), адно вялікае яйка, зваранае ўкрутую, змяшчае 147 міліграмаў халіну, і з’яўляецца другой па велічыні крыніцай гэтага рэчыва пасля ялавічнай печані. Іх спажыванне можа дапамагчы не адставаць ад штодзённай нормы халіну: для мужчын яна складае каля 402 міліграмаў рэчыва ў дзень, для жанчын — каля 278 міліграмаў.
Каментары
даць закіпець, адразу зняць з агня. усё. нават калі пакінуць у вадзе да поўнага астывання, жаўток не будзе мець шэрай каймы, і яго структура будзе найлепшай.
але можна дастаць у любы час і з гарачай вады, пасля пэўнага часу
ну і спосаб добры яшчэ тым, што не трэба пільна сачыць за гадзіннікам