Звольнілі «сенатара» Маркевіча, дырэктара птушкафабрыкі «Дружба». Магчыма, нават і затрымлівалі
На ААТ «Птушкафабрыка «Дружба» знялі з пасады дырэктара Васіля Маркевіча, які ўзначальваў яе амаль 20 гадоў. Супрацоўнікі паведамляюць, што яго верагодна затрымлівалі, піша «Зеркало».
Некалькі не звязаных паміж сабой крыніц 1 жніўня паведамілі рэдакцыі «Зеркала», што быў затрыманы 64-гадовы Васіль Маркевіч, гендырэктар птушкафабрыкі «Дружба» ў Баранавіцкім раёне. Супрацоўнікі прадпрыемства казалі, што затрыманне магло быць звязана з атрыманнем хабару.
З сайта прадпрыемства ў той жа дзень прапала згадка Маркевіча ў раздзеле кіраўніцтва, ды і ўвогуле пазіцыя гендырэктара.
Журналістка «Зеркала» патэлефанавала намесніку гендырэктара Валерыю Самушчыку як фізасоба — ён пацвердзіў, што Маркевіч на гэтай пасадзе больш не працуе, але тлумачыць прычыны адмовіўся. Таксама ў адміністрацыі прадпрыемства не сталі адказваць на пытанні аб падрабязнасцях звальнення, пацвярджаць або аспрэчваць інфармацыю аб затрыманні.
Сам ужо былы гендырэктар 2 жніўня адказаў на званок, але адразу ж паклаў слухаўку, як толькі пачуў пытанне. У якім прававым статусе ён цяпер знаходзіцца, невядома.
Птушкафабрыка «Дружба» — адно з найбуйнейшых прадпрыемстваў па вытворчасці мяса птушкі ў Беларусі. Васіль Маркевіч узначаліў яго ў 2003 годзе. У 2014-м Лукашэнка ўручаў яму падзяку за «значны ўклад у развіццё сельскагаспадарчай вытворчасці».
Таксама Маркевіч заслужаны работнік сельскай гаспадаркі Беларусі, кавалер ордэна Працоўнай славы за «асабісты ўклад у развіццё прамысловага комплексу і дасягненне высокіх вытворчых паказчыкаў». Ён уваходзіць у цяперашні склад Савета Рэспублікі, пастаянную камісію па эканоміцы, бюджэце і фінансах, прадстаўляе Брэсцкую вобласць.
Цяпер чытаюць
17‑гадовы хлопец жыве ў падвале. Ён загарнуўся ў чырвона-зялёны сцяг, каб Лукашэнка звярнуў на яго ўвагу22
Каментары