Zvolnili «sienatara» Markieviča, dyrektara ptuškafabryki «Družba». Mahčyma, navat i zatrymlivali
Na AAT «Ptuškafabryka «Družba» źniali z pasady dyrektara Vasila Markieviča, jaki ŭznačalvaŭ jaje amal 20 hadoŭ. Supracoŭniki paviedamlajuć, što jaho vierahodna zatrymlivali, piša «Zierkało».
Niekalki nie źviazanych pamiž saboj krynic 1 žniŭnia paviedamili redakcyi «Zierkała», što byŭ zatrymany 64-hadovy Vasil Markievič, hiendyrektar ptuškafabryki «Družba» ŭ Baranavickim rajonie. Supracoŭniki pradpryjemstva kazali, što zatrymańnie mahło być źviazana z atrymańniem chabaru.
Z sajta pradpryjemstva ŭ toj ža dzień prapała zhadka Markieviča ŭ raździele kiraŭnictva, dy i ŭvohule pazicyja hiendyrektara.
Žurnalistka «Zierkała» patelefanavała namieśniku hiendyrektara Valeryju Samuščyku jak fizasoba — jon paćvierdziŭ, što Markievič na hetaj pasadzie bolš nie pracuje, ale tłumačyć pryčyny admoviŭsia. Taksama ŭ administracyi pradpryjemstva nie stali adkazvać na pytańni ab padrabiaznaściach zvalnieńnia, paćviardžać abo asprečvać infarmacyju ab zatrymańni.
Sam užo były hiendyrektar 2 žniŭnia adkazaŭ na zvanok, ale adrazu ž pakłaŭ słuchaŭku, jak tolki pačuŭ pytańnie. U jakim pravavym statusie jon ciapier znachodzicca, nieviadoma.
Ptuškafabryka «Družba» — adno z najbujniejšych pradpryjemstvaŭ pa vytvorčaści miasa ptuški ŭ Biełarusi. Vasil Markievič uznačaliŭ jaho ŭ 2003 hodzie. U 2014-m Łukašenka ŭručaŭ jamu padziaku za «značny ŭkład u raźvićcio sielskahaspadarčaj vytvorčaści».
Taksama Markievič zasłužany rabotnik sielskaj haspadarki Biełarusi, kavaler ordena Pracoŭnaj słavy za «asabisty ŭkład u raźvićcio pramysłovaha kompleksu i dasiahnieńnie vysokich vytvorčych pakazčykaŭ». Jon uvachodzić u ciapierašni skład Savieta Respubliki, pastajannuju kamisiju pa ekanomicy, biudžecie i finansach, pradstaŭlaje Bresckuju vobłaść.
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary