У нашым кішэчніку жывуць тысячы відаў мікраарганізмаў, якія адыгрываюць важную ролю для нашага здароўя. Аказваецца, што некаторыя прадукты нясуць для іх вялікую карысць, а значыць, дапамагаюць і нам жыць лепей. Нядаўна вучоныя адкрылі, што адным з такіх прадуктаў з’яўляецца міндаль.
Навукоўцы Каралеўскага каледжа ў Лондане паведамілі, што міндаль станоўча ўплывае на здароўе мікрабіёму — карысных для чалавека мікраарганізмаў у кішэчніку. У працы, што дапамагла гэта высветліць, прынялі ўдзел 97 здаровых дарослых, якія елі нездаровыя закускі і менш прадуктаў з клятчаткай, чым рэкамендуюць дыетолагі.
Доследных падзялілі на тры групы. У адной з іх замянілі сутачную порцыю нездаровых перакусаў 56 грамамі цэльнага міндалю, у другой — 56 грамамі меленага міндалю, а ў трэцяй накармілі доследных кексамі з такой жа каларыйнасцю, як і 56 грамаў міндалю. Даследаванне праводзілася на працягу чатырох тыдняў.
Праца паказала: штодзённае ўжыванне жмені міндалю павялічвае колькасць маслянай кіслаты ў кішэчніку, а гэта, у сваю чаргу, станоўча ўплывае на карысныя мікраарганізмы ў ім. Клеткі кішэчнага эпітэлію выкарыстоўваюць масляную кіслату для вытворчасці энергіі, яна дапамагае ім падтрымліваць правільную структуру кішэчніка і цэласнасць кішэчнага эпітэлію, які патрэбны для належнага развіцця мікрабіёму. У людзей, якія ўжывалі міндаль, было нашмат больш кішэчнага мікрабіёму, чым у тых, хто еў кексы.
Але ва ўсіх трох групах навукоўцы не зафіксавалі адрозненняў у часе праходжання ежы па кішэчніку. Даследчыкі выявілі, што людзі, якія елі цэльны міндаль, у сярэднім апаражнялі кішэчнік на 1,5 разу часцей, чым іншыя доследныя, і гэта можа сведчыць, што цэльны міндаль можа дапамагчы людзям даць рады запору.
Акрамя таго, людзі, якія ядуць міндаль, спажываюць шмат монаненасычаных тлустых кіслот, клятчаткі, калію і іншых карысных рэчываў. Вядучы аўтар даследавання, прафесар Кевін Уілан, лічыць, што ўжыванне жмені міндалю ў дзень станоўча ўплывае на наш мікрабіём і, такім чынам, на ўсё наша здароўе.
Каментары