Каманда Навальнага выпусціла расследаванне «Як Суравікін зарабляе на вайне»
Лесапрамысловае прадпрыемства са Свярдлоўскай вобласці, звязанае з жонкай генерала Сяргея Суравікіна, атрымлівала грошы ад кампаніі па здабычы фасфатаў у Сірыі, звязанай з сябрам прэзідэнта Расіі Уладзіміра Пуціна Генадзем Цімчанкам. Пра гэта гаворыцца ў новым расследаванні каманды апазіцыянера Аляксея Навальнага.
Сяргей Суравікін — камандуючы расійскай групоўкай ва Украіне, які раней камандаваў войскамі Расіі у Сірыі. Яго жонка Ганна Суравікіна ў сярэдзіне 2000-х стала сузаснавальніцай фірмы «Аргус СФК». Бізнэс-партнёрам жонкі генерала была Анастасія Мішарына — дачка намесніка міністра транспарту Расіі, які пазней стаў губернатарам Свярдлоўскай вобласці.
У 2011 годзе Леанід Волкаў — адзін з найбліжэйшых паплечнікаў Навальнага, які на той момант быў дэпутатам гарадской думы Екацерынбурга, — абвінаваціў «Аргус СФК» у незаконным атрыманні льгот; пазней суд запатрабаваў абвергнуць гэтыя заявы.
Як паведамляе каманда Навальнага, фірма «Аргус СФК» працягвае працаваць дагэтуль, хоць у яе змяніліся ўласнікі. Як мінімум з 2018 года «Аргус СФК» была стратнай.
Структуры Цімчанкі пачалі аднаўляць здабычу на радовішчах фасфатаў Эш-Шаркія і Хнейфіс летам 2017 года. У снежні таго ж года Суравікін, які быў камандуючым расійскімі войскамі ў Сірыі, асабіста дакладваў прэзідэнту Расіі аб вызваленні двух радовішчаў фасфатных руд. Каманда Навальнага мяркуе, што расійскія вайскоўцы таксама бралі ўдзел у забеспячэнні бяспечнага вывазу фасфатаў з Сірыі.
Цяпер чытаюць
«Дзед будзе глядзець асабіста. Калі яму спадабаецца…» Зянковіч расказаў, як з ім запісвалі першае інтэрв'ю ў СІЗА КДБ14
Каментары