Прэзідэнтка Еўракамісіі і прэм'ерка Фінляндыі расказалі, як змагаюцца з сэксізмам
Кіраўніца Еўрапейскай камісіі Урсула Фон дэр Ляен і старшыня ўрада Фінляндыі Сана Марын на панэльнай дыскусіі Мюнхенскай канферэнцыі па бяспецы падзяліліся вопытам таго, як еўрапейскія ўрады да гэтага часу дэманструюць сэксізм у дачыненні да палітыкаў, піша «Еўрапейская праўда».
Сана Марын, адказваючы на пытанне пра гэта, нагадала пра нядаўнюю гісторыю, калі яе ўдзел у відэа з танцамі, зробленым на прыватнай вечарынцы, выклікаў скандал, і многія лічылі, што гэта мае коранем тое, што яна жанчына, а не толькі прэм'ер-міністарка.
Зрэшты, Марын не лічыць свае паводзіны памылкай. «Я танцавала і пасля таго разу», — падкрэсліла яна.
Прэзідэнтка Еўракамісіі, са свайго боку, падзялілася вопытам фармавання складу ЕК у 2019 годзе.
Фон дэр Ляен распавяла, што пасля пацверджання яе прызначэння на пасаду яна пачала фармаваць склад ЕК, і паставіла мэту сфармаваць гендэрна збалансаванае камісію.
«Тады я звярнулася да ўсіх краін — членаў ЕС даць мне дзве кандыдатуры, мужчыну і жанчыну, каб я магла выбраць аднаго чалавека. І вы проста не ўяўляеце, якой абуранай была рэакцыя! Былі чальцы, якія даслалі траіх мужчын для выбару», — распавяла яна.
Урсула фон дэр Ляен таксама ўспомніла, што раней сітуацыя была горшай, і яе ў свой час — калі яна працавала міністаркай пасля нараджэння першых дзяцей, калегі прама рэкамендавалі «вызначыцца, кім яна хоча быць, дрэннай маці або дрэнным міністрам».
Сана Марын запэўніла, што цяпер сітуацыя мяняецца. Напрыклад, у яе ўрадзе адзін з мужчын-міністраў вырашыў сысці з пасады ў «бацькоўскі адпачынак». «Гэта — рэальная гендарная роўнасць, якой я ганаруся», — заявіла кіраўніца ўрада Фінляндыі.
Каментары