Палата прадстаўнікоў ЗША прагаласавала супраць спробы імпічменту міністра абароны Піта Хегсэта
Спроба распачаць працэдуру імпічменту міністра абароны ЗША Піта Хегсэта, якога абвінавачвалі ў развязванні вайны супраць Ірана без санкцыі Кангрэса, правалілася.
Большасць членаў Палаты прадстаўнікоў Кангрэса прагаласавала за перадачу артыкулаў аб імпічменце ў профільны камітэт. Па сутнасці, гэта азначае спыненне ініцыятывы, вылучанай кангрэсменам-рэспубліканцам ад штата Кентукі Томасам Масі, піша Бі-бі-сі.
На сваім першым за паўгода брыфінгу ў Пентагоне Хегсэт назваў спробу імпічменту «фарсам» і «дыверсіяй».
Спроба прызнаць кіраўніка абароннага ведамства вінаватым у службовай правіне і дамагчыся яго зняцця з пасады першапачаткова мела вельмі мала шанцаў на поспех, паколькі для гэтага спатрэбілася б, каб шэраг іншых рэспубліканцаў пайшлі супраць прэзідэнта Дональда Трампа.
Ініцыятыва Томаса Масі была адхілена 211 галасамі супраць 204; пры гэтым больш за дзесяць заканадаўцаў, у тым ліку 11 дэмакратаў, у галасаванні не ўдзельнічалі.
Перадача дакумента ў камітэт фактычна зводзіць на нішто ўсе намаганні, паколькі да заканчэння працы цяперашняга складу Кангрэса засталося зусім няшмат часу, а ў студзені кантроль над Палатай прадстаўнікоў пяройдзе да дэмакратаў.
Прэзідэнт Трамп пракаментаваў вынікі галасавання ў сацыяльнай сетцы Truth Social, заявіўшы, што спроба «з трэскам правалілася».
«Перамогі ў Венесуэле і Іране, найлепшыя паказчыкі па наборы ў армію за ўсю яе гісторыю (велізарныя чэргі ахвотных уступіць у шэрагі ўзброеных сіл!) і неверагодны, рэдка сустраканы раней баявы дух — усё гэта прывяло да поўнага апраўдання вялікага амерыканскага патрыёта», — напісаў Трамп, маючы на ўвазе Хэгсэта.
Пасля галасавання Масі прызнаўся, што «не здзіўлены», але «расчараваны».
«Мой дыягназ Кангрэсу такі: гэтыя людзі выдатна ведаюць, што трэба рабіць, — дадаў ён. — Але яны проста не могуць прымусіць сябе гэта зрабіць, нават калі гэта прынесла б ім палітычную выгаду».
Раней Масі прызнаваў, што яго спроба ініцыяваць працэдуру імпічменту можа не ўвянчацца поспехам адразу, аднак, на яго думку, яна магла б падштурхнуць Трампа да замены Хегсэта — яшчэ да таго, як дэмакраты паспеюць запусціць уласны працэс імпічменту.
Цяпер чытаюць
Суддзі, якія плакалі, суддзі, якія атрымлівалі асалоду, і суддзі, якія прыніжаліся перад міліцыяй1
Каментары