Літоўскі бізнэсмен пакаяўся, што дапамагаў «Гродна Азоту» абыходзіць санкцыі
Літоўскі цэнтр журналісцкіх расследаванняў Siena, які вывучае магчымыя ценявыя схемы паставак угнаенняў з Беларусі ў Еўрасаюз, паведаміў, што літоўскі бізнэсмен Саўлюс Коціс прынёс публічныя прабачэнні, што праз сваю кампанію ў Кыргызстане дапамагаў абыходзіць санкцыі ў дачыненні «Гродна Азота».
Раней па выніках журналісцкіх расследаванняў стала вядома пра існаванне ланцужка кампаній, якія займаюцца ўвозам у Літву беларускага карбаміду пад выглядам угнаення, зробленага кампаніямі з іншых краін. Падсанкцыйны беларускі «Гродна Азот» сам гандляваць з ЕС адкрыта не можа, але рабіў гэта праз «фірму-пракладку».
Перавозку ўгнаенняў па чыгунцы аплаціла клайпедская кампанія Girera, а пакупніком значыцца фірма Misir.Co з Кыргызстана, акцыянерам якой з'яўляецца літоўскі бізнэсовец Саўлюс Коціс. Ён сам пацвердзіў Siena, што ўдзельнічаў у гэтай схеме.
Прадпрымальнік публічна папрасіў прабачэння ва ўсіх, хто «быў расчараваны безадказнымі паводзінамі» яго самога і яго калег, і прызнаўся, што мае намер «згарэць у агні сораму і нянавісці да сябе». Ён таксама запэўніў, што дамова на пастаўку карбаміду з Беларусі ўжо скасаваная, а дзейнасць Misir.Co прыпыненая.
Такое нечаканае прасвятленне бізнэсмена відавочна звязанае з тым, што апошнім часам літоўскія ўлады выразна засведчылі сур'ёзнасць сваіх намераў не на словах, а на справе паставіць заслону шэрым схемам, скіраваным на абыход заходніх санкцый. На пачатку года пачалося расследаванне кантрабанды ўгнаенняў «Гродна Азота», у некалькіх кампаніях прайшлі вобшукі і затрыманні.
Чытайце таксама:
Прэм'ерка Літвы: Адмова ад перавозкі беларускіх грузаў літоўскай чыгункай — самае простае рашэнне
Прэзідэнт Літвы: Літоўскія кампаніі, у дварах якіх лунаюць украінскія сцягі, могуць адначасова дапамагаць Лукашэнку
Літоўскія службы расследуюць, хто дапамагае пастаўляць беларускія ўгнаенні ў Еўропу. Затрымалі карбаміду на 2 млн еўра
Фірму-пракладку для абыходу санкцый узначальвае старшыня аднаго з выбаркамаў 2020 года — расследаванне
Лукашэнка быў у Маскве без георгіеўскай стужкі. Наяўнасць або адсутнасць стужак падзяліла гасцей парада на дзве групы10
Каментары