«Мы чакалі, што пераможа здаровы сэнс, але перамаглі расійскія рублі». Украіна прапусціць чэмпіянат свету па дзюдо з-за ўдзелу расіян і беларусаў
Зборная Украіны па дзюдо прыняла рашэнне байкатаваць чэмпіянат свету, паведаміў выданню «Суспільне. Спорт» галоўны трэнер каманды Віталь Дуброва. Рашэнне ўкраінскай каманды звязана з допускам на спаборніцтвы атлетаў з Расіі і Беларусі ў нейтральным статусе.
Віталь Дуброва падкрэсліў: зборная Украіны байкатуе чэмпіянат свету менавіта з-за допуску расійскіх і беларускіх дзюдаістаў, а не з якіх іншых прычын.
«Мы чакалі і спадзяваліся, што здаровы сэнс пераможа. На жаль, перамаглі расійскія рублі», — канстатаваў Дуброва.
Пры гэтым украінскі галоўны трэнер звярнуў увагу на тое, што Міжнародная федэрацыя дзюдо нават не рабіла праверкі спартсменаў, якія трапілі ў заяўку на чэмпіянат свету. У рэкамендацыях МАК ад 28 сакавіка 2023 года было пазначана, што атлетаў з кантрактамі з Узброенымі сіламі Расіі ці Беларусі да спаборніцтваў дапускаць не павінны. У той жа час
«у спісе расіян практычна ўсе спартоўцы датычныя да сілавых структур або ўваходзяць у ЦСКА ці Расгвардыю. Тым больш, у інтэрнэце куча фатаграфій, дзе яны ў вайсковай форме, з Шайгу фатаграфуюцца, узнагароды атрымліваюць. Гэта значыць, казаць, што быў нейкі маніторынг, не выпадае. Вядома, ніхто гэтага не рабіў, нейкая фармальнасць».
Чэмпіянат свету па дзюдо пройдзе з 7 па 13 мая ў Досе. Акрамя медалёў, спартсмены будуць змагацца за атрыманне ачкоў, якія будуць ісці ў алімпійскі рэйтынг — менавіта ён будзе вызначаць адбор на Алімпіяду-2024 у кожнай вагавой катэгорыі.
Бедны, расчараваны — асабліва ў родных — і нікому непатрэбны. Злы дзённік Барадуліна дазваляе зазірнуць унутр генія17
Каментары