«My čakali, što pieramoža zdarovy sens, ale pieramahli rasijskija rubli». Ukraina prapuścić čempijanat śvietu pa dziudo z-za ŭdziełu rasijan i biełarusaŭ
Zbornaja Ukrainy pa dziudo pryniała rašeńnie bajkatavać čempijanat śvietu, paviedamiŭ vydańniu «Suśpilnie. Sport» hałoŭny trenier kamandy Vital Dubrova. Rašeńnie ŭkrainskaj kamandy źviazana z dopuskam na spabornictvy atletaŭ z Rasii i Biełarusi ŭ niejtralnym statusie.
Vital Dubrova padkreśliŭ: zbornaja Ukrainy bajkatuje čempijanat śvietu mienavita z-za dopusku rasijskich i biełaruskich dziudaistaŭ, a nie ź jakich inšych pryčyn.
«My čakali i spadziavalisia, što zdarovy sens pieramoža. Na žal, pieramahli rasijskija rubli», — kanstatavaŭ Dubrova.
Pry hetym ukrainski hałoŭny trenier źviarnuŭ uvahu na toje, što Mižnarodnaja fiederacyja dziudo navat nie rabiła pravierki spartsmienaŭ, jakija trapili ŭ zajaŭku na čempijanat śvietu. U rekamiendacyjach MAK ad 28 sakavika 2023 hoda było paznačana, što atletaŭ z kantraktami z Uzbrojenymi siłami Rasii ci Biełarusi da spabornictvaŭ dapuskać nie pavinny. U toj ža čas
«u śpisie rasijan praktyčna ŭsie spartoŭcy datyčnyja da siłavych struktur abo ŭvachodziać u CSKA ci Rashvardyju. Tym bolš, u internecie kuča fatahrafij, dzie jany ŭ vajskovaj formie, z Šajhu fatahrafujucca, uznaharody atrymlivajuć. Heta značyć, kazać, što byŭ niejki manitorynh, nie vypadaje. Viadoma, nichto hetaha nie rabiŭ, niejkaja farmalnaść».
Čempijanat śvietu pa dziudo projdzie z 7 pa 13 maja ŭ Dosie. Akramia miedaloŭ, spartsmieny buduć zmahacca za atrymańnie ačkoŭ, jakija buduć iści ŭ alimpijski rejtynh — mienavita jon budzie vyznačać adbor na Alimpijadu-2024 u kožnaj vahavoj katehoryi.
Kamientary