У Еўропе падрыхтавалі рэкамендацыі па спрашчэнні легалізацыі беларусаў, якія ўцяклі ад рэпрэсій
Камітэт Парламенцкай асамблеі Рады Еўропы па міграцыі, уцекачах і перамешчаных асобах заклікаў еўрапейскія дзяржавы зрабіць «юрыдычныя і практычныя крокі» для прыняцця беларусаў, вымушаных пакінуць сваю краіну праз рэпрэсіі з боку рэжыму Аляксандра Лукашэнкі, піша «Радыё Свабода».
«У аднагалосна ўхваленым праекце рэзалюцыі, заснаваным на дакладзе Пола Галеса (Люксембург), камітэт заявіў, што «беларускі народ — гэта не тое ж самае, што рэжым Лукашэнкі», і да яго не трэба ставіцца дыскрымінацыйным чынам праз удзел рэжыму ў вайне супраць Украіны », — гаворыцца ў паведамленні прэс-службы ПАРЕ.
Адзначаецца, што
«большасць беларусаў у выгнанні жадаюць толькі аднаго — вярнуцца ў дэмакратычную Беларусь», але пакуль гэта не здарылася, уладам іншых дзяржаў трэба «зрабіць усё магчымае», каб беларусы маглі заставацца ў краінах, якія іх прымаюць, «на законных падставах» і ў «дастойных умовах».
Парламентарыі «віталі намаганні Літвы і Польшчы па пошуку прававых і практычных рашэнняў, якія даюць магчымасць зрабіць беларусаў у выгнанні больш жаданымі гасцямі», але
падкрэслілі, што «можна зрабіць больш», і заклікалі да «нестандартных рашэнняў».
«Камітэт падрыхтаваў шэраг практычных рэкамендацый па спрашчэнні легальнага ўезду і знаходжання [беларусаў] па-за межамі Беларусі, паездак па ЕС для «выгнаннікаў» і іх сем’яў, а таксама крокі па забеспячэнні іх абароны ад рэпрэсій, магчымасці доступу да сваіх банкаўскіх рахункаў і вядзення бізнэсу», — гаворыцца ў паведамленні.
«Дзяржавы і парламенты мусяць падтрымліваць дэмакратычныя сілы [Беларусі] у выгнанні, грамадзянскую супольнасць і адвакатаў, заахвочваць беларускую адукацыю і культуру рознымі спосабамі», — лічаць сябры Міграцыйнага камітэта ПАРЕ.
Чакаецца, што адпаведны даклад будзе вынесены на абмеркаванне ПАРЕ ў чэрвені.
Галоўным спікерам Жаночага форуму ў Мінску стане расійскі крынджовы псіхолаг, які расказваў пра «памяць жаночых палавых губ»12
Каментары