U Jeŭropie padrychtavali rekamiendacyi pa spraščeńni lehalizacyi biełarusaŭ, jakija ŭciakli ad represij
Kamitet Parłamienckaj asamblei Rady Jeŭropy pa mihracyi, uciekačach i pieramieščanych asobach zaklikaŭ jeŭrapiejskija dziaržavy zrabić «jurydyčnyja i praktyčnyja kroki» dla pryniaćcia biełarusaŭ, vymušanych pakinuć svaju krainu praz represii z boku režymu Alaksandra Łukašenki, piša «Radyjo Svaboda».
«U adnahałosna ŭchvalenym prajekcie rezalucyi, zasnavanym na dakładzie Poła Halesa (Luksiemburh), kamitet zajaviŭ, što «biełaruski narod — heta nie toje ž samaje, što režym Łukašenki», i da jaho nie treba stavicca dyskryminacyjnym čynam praz udzieł režymu ŭ vajnie suprać Ukrainy », — havorycca ŭ paviedamleńni pres-słužby PARIE.
Adznačajecca, što
«bolšaść biełarusaŭ u vyhnańni žadajuć tolki adnaho — viarnucca ŭ demakratyčnuju Biełaruś», ale pakul heta nie zdaryłasia, uładam inšych dziaržaŭ treba «zrabić usio mahčymaje», kab biełarusy mahli zastavacca ŭ krainach, jakija ich prymajuć, «na zakonnych padstavach» i ŭ «dastojnych umovach».
Parłamientaryi «vitali namahańni Litvy i Polščy pa pošuku pravavych i praktyčnych rašeńniaŭ, jakija dajuć mahčymaść zrabić biełarusaŭ u vyhnańni bolš žadanymi haściami», ale
padkreślili, što «možna zrabić bolš», i zaklikali da «niestandartnych rašeńniaŭ».
«Kamitet padrychtavaŭ šerah praktyčnych rekamiendacyj pa spraščeńni lehalnaha ŭjezdu i znachodžańnia [biełarusaŭ] pa-za miežami Biełarusi, pajezdak pa ES dla «vyhnańnikaŭ» i ich siemjaŭ, a taksama kroki pa zabieśpiačeńni ich abarony ad represij, mahčymaści dostupu da svaich bankaŭskich rachunkaŭ i viadzieńnia biznesu», — havorycca ŭ paviedamleńni.
«Dziaržavy i parłamienty musiać padtrymlivać demakratyčnyja siły [Biełarusi] u vyhnańni, hramadzianskuju supolnaść i advakataŭ, zaachvočvać biełaruskuju adukacyju i kulturu roznymi sposabami», — ličać siabry Mihracyjnaha kamiteta PARIE.
Čakajecca, što adpaviedny dakład budzie vyniesieny na abmierkavańnie PARIE ŭ červieni.
Chvala emihracyi ŭ 2021—2023 hadach — samaja vialikaja ŭ historyi Biełarusi. Ličby
«Ludzi źjazdžajuć z razumieńniem, što chutka jany nie viernucca». Psichołah pra novuju chvalu mihracyi ź Biełarusi
Letaś biełarusy ŭ Polščy adkryli amal u 4 razy bolš firm, čym u 2020-m. Čym tam zajmajucca biełaruskija biznesoŭcy
Kamientary