«Нават ядзерная зброя адна на дваіх». Такаеў лічыць праблемай Саюзную дзяржаву ў складзе ЕАЭС
Прэзідэнт Казахстана Касым-Жамарт Такаеў назваў праблемаю ступень інтэграцыі паміж Беларуссю і Расіяй і астатнімі краінамі ЕАЭС. На сённяшнім Еўразійскім эканамічным форуме ён адзначыў, што гэта пытанне трэба абмяркоўваць.
«Яшчэ адзін момант, так бы мовіць, канцэптуальнай рэальнасці ці спецыфіка, якую нам трэба ўлічваць. Гэта наяўнасць у рамках Еўразійскага эканамічнага саюза Саюзнай дзяржавы ў асобе Беларусі і Расіі.
Канцэптуальная ідэалагічная аснова гэтага саюза дастаткова сур'ёзная. Гэта ўзаемнае прызнанне гістарычнай супольнасці беларускага і рускага народаў, прызнанне культурнай, моўнай, рэлігійнай ідэнтычнасці, гэта значыць прызнанне наяўнасці аднаго народа. Адзін народ — адна дзяржава.
У нас ёсць у Еўразійскім эканамічным саюзе Саюзная дзяржава. Гэта значыць, у сусветнай палітычнай гісторыі створаны ўнікальны прэцэдэнт або феномен, як хочаце. Стварэнне дзяржавы па формуле «дзве краіны — адна дзяржава» з адзінай палітычнай, юрыдычнай, вайсковай, эканамічнай, валютнай, культурнай, гуманітарнай прасторай, з адзіным саюзным урадам, з адзіным саюзным парламентам. Ну, я прашу прабачэння, і нават ядзерная зброя адна на дваіх зараз», — сказаў ён.
На гэтых словах Пуцін і Лукашэнка эмацыйна паціснулі адзін аднаму рукі.
Такаеў лічыць такую ступень інтэграцыі ў ЕАЭС праблемай.
«Ёсць іншы ўзровень інтэграцыі, прадстаўленай Казахстанам, Кыргызстанам, Арменіяй. І з гэтай рэальнасцю нам трэба лічыцца. Як мы будзем працаваць у гэтых умовах? Гэта пытанне канцэптуальнае. Нам трэба, я думаю, у тым ліку і на гэтым эканамічным форуме абмеркаваць гэту праблему», — дадаў Токаеў.
Пра тое, што Расія па просьбе Лукашэнкі размесціць у Беларусі ядзерную зброю, Пуцін заявіў у сакавіку. На тэрыторыі Беларусі яе пакуль няма.
Актывістка Наста Базар папрасіла ў сяброў грошы на жыццё. Меркаванні радыкальна падзяліліся38
Каментары